प्रकाशित मिति : १५ जेष्ठ २०८३, शुक्रबार
तस्बिर: एआईको सहयोगमा
अमेरिकाको भर्जिनियामा भएको बस दुर्घटनामा पाँच जनाको मृत्यु भएको छ। दुर्घटनामा तीन दर्जनभन्दा बढी मानिस घाइते भएका छन्।
यात्रुवाहक बसले अगाडि रहेका छ वटा सवारीसाधनलाई ठक्कर दिँदा पाँच जनाको मृत्यु भएको हो भने करिब तीन दर्जन मानिस घाइते भएका हुन्।
भर्जिनिया राज्य प्रहरीका अनुसार दुर्घटना अन्तरराज्यीय राजमार्ग–९५ को दक्षिणतर्फ जाने लेनमा भएको हो। सडक मर्मत कार्य भइरहेको क्षेत्रका कारण सवारीसाधनको गति सुस्त भएका बेला बसले समयमै गति कम गर्न नसक्दा दुर्घटना भएको प्रारम्भिक अनुसन्धानले देखाएको छ।
दुर्घटनामा घाइते भएका कम्तीमा ४४ जनालाई उपचारका लागि अस्पताल पुर्याइएको छ। तीमध्ये तीन जनाको अवस्था गम्भीर रहेको बताइएको छ। मृत्यु हुने पाँचै जना बसले ठक्कर दिएका सवारीसाधनमा सवार व्यक्तिहरू थिए।
न्युयोर्कबाट नर्थ क्यारोलिनातर्फ जाँदै गरेको उक्त बस ‘ई एन्ड पी ट्राभल’ कम्पनीद्वारा सञ्चालन गरिएको थियो। प्रहरीका अनुसार बस चालक ४८ वर्षीय जिङ एस. डोङ पनि दुर्घटनामा घाइते भएका छन्। उनीविरुद्ध मुद्दा चलाउने तयारी भइरहेको छ। दुर्घटनाअघि उनको गतिविधिबारे पनि अनुसन्धान भइरहेको प्रहरीले जनाएको छ। दुर्घटनाका बेला बसमा ३४ जना यात्रु सवार थिए।
प्रहरीका अनुसार बसले सुरुमा एउटा शेभ्रोलेट सबर्बन गाडीलाई ठक्कर दिएको थियो। त्यसपछि उक्त गाडी अर्को एक्युरा स्पोर्ट्स युटिलिटी (एसयूभी) सवारीसाधनमा ठोक्किएको थियो र अन्य सवारीसाधनहरू पनि दुर्घटनामा परेका थिए।
ठक्करपछि आगलागी भएको एक्युरा सवारीसाधनमा रहेका चार जनाको मृत्यु भएको छ। मृत्यु हुनेमा म्यासाचुसेट्स राज्यका ४५ वर्षीय पुरुष, ४४ वर्षीया महिला, १३ वर्षीया बालिका र सात वर्षीय बालक रहेका छन्।
अर्की मृतक सबर्बन गाडीमा सवार २५ वर्षीया महिला रहेको प्रहरीले जनाएको छ। उनी पनि म्यासाचुसेट्स राज्यकै निवासी थिइन्। मृतकहरूको नाम भने अझै सार्वजनिक गरिएको छैन।
दुर्घटनापछि सार्वजनिक गरिएका तस्बिरहरूमा क्षतिग्रस्त बस राजमार्गको छेउको घाँसे क्षेत्रमा पल्टिएको अवस्थामा देखिएको छ। प्रहरीले घटनाको थप अनुसन्धान जारी रहेको जनाएको छ।