प्रकाशित मिति : पुस २८, २०८१ आईतबार
नर्वे विद्युत गाडी अपनाउने विश्वकै अग्रणी देश बन्न सफल भएको छ । नर्वेमा विद्युत गाडी “EV” को लोकप्रियता दिन प्रतिदिन बढ्दो देखिएको छ ।
गएको वर्ष मात्र नर्वेमा बिक्री भएका १० वटा नयाँ गाडीमध्ये ९ वटा विद्युत गाडी थिए ।
ओस्लोस्थित गाडी डिलरशिप हाराल्ड ए मोलरले ७५ वर्षदेखि भोक्सवागन गाडी आयात गर्दै आएको थियो ।
तर, २०२४ को सुरुवातमै यसले इन्धनमा चल्ने गाडीको बिक्री बन्द गर्दै आफ्नो शो रूममा बिक्री गरिने सबै गाडी विद्युतमा चल्ने बनाएको छ ।
ओस्लोका सडकहरूमा हेर्दा, विद्युत गाडीहरू नयाँ कुरा जस्तो लाग्दैन । यहाँका अधिकांश गाडीका नम्बर प्लेटमा “E” लेखिएको देख्न सकिन्छ, जसको अर्थ इलेक्ट्रिक हो।
५.५ मिलियन जनसंख्या भएको नर्वेले विद्युत गाडीहरूलाई तीव्र रूपमा अपनाएको छ । यो देश नयाँ इन्धनमा चल्ने गाडीको बिक्री पूर्णरूपमा बन्द गर्ने पहिलो राष्ट्र बन्न नजिक पुगेको छ ।
गएको वर्ष नर्वेमा पेट्रोल गाडीभन्दा विद्युत गाडीहरूको संख्या बढी भएको थियो । डीजल गाडीसमेत जोड्दा, नर्वेका सडकमा करिब एक तिहाइ गाडीहरू विद्युतमा चल्ने छन् ।
२०२४ मा नर्वेमा बिक्री भएका ८८.९५ नयाँ गाडी विद्युत थिए । जुन २०२३ को तुलनामा ८२.४५ बाट बढेको हो । केही महिनाहरूमा यो दर ९८ प्रतिशत सम्म पुगेको थियो।
नर्वेको विद्युत गाडी क्रान्ति तीन दशक अघिदेखि शुरू भएको हो। १९९० को दशकमा पेट्रोल र डीजल गाडीमा कर बढाएर र विद्युत गाडीलाई कर छुट दिएर यो अभियान अघि बढाइएको थियो ।
नर्वेले ठूला परियोजनाहरू सजिलै अघि बढाउन सक्छ । तेल र ग्यास निर्यातबाट प्राप्त भएको १.७ ट्रिलियन डलर भन्दा ठूलो सम्पत्तिका कारण ठुला योजना अगाडि बढाउन नर्बेलाई सजिलो छ ।
विद्युत उत्पादनमा पनि नर्वे सम्पन्न छ । यहाँ उत्पादन हुने ८८ प्रतिशत विद्युत जलविद्युत स्रोतबाट हुन्छ ।