ट्रम्प शैलीको आप्रवासी भिसामा प्रतिबन्ध लगाउँदै बेलायती सरकार, सोमबार घोषणा गर्ने तयारी

बेलायतले गैर कानुनी रूपमा युके प्रवेश गर्ने आप्रवासीलाई फिर्ता लिन अस्वीकार गर्ने देशहरूमाथि कडा कदम चाल्दै भिसा प्रतिबन्ध लगाउने तयारी गरेको छ। बेलायती गृहमन्त्री शबाना महमूदले सोमबार आप्रवासन प्रणालीमा व्यापक सुधार घोषणा गर्दै आश्रय प्रक्रियामा उल्लेखनीय परिवर्तनको घोषणा गर्नेछिन्। 

नयाँ प्रावधानअनुसार अब शरणार्थीको दर्जा अस्थायी हुनेछ भने स्थायी बसोबासका लागि आवेदन दिन शरणार्थीहरूले २० वर्ष पर्खिनुपर्नेछ। 

बेलायती सरकारले अङ्गोला, नामिबिया र कंगो लोकतान्त्रिक गणतन्त्रका सरकारले अपराधी तथा गैर कानुनी आप्रवासीलाई फिर्ता लैजान सहयोग नगरेमा उक्त देशहरूका नागरिकहरूको प्रवेश पनि रोक्ने चेतावनी दिएको छ । अङ्गोला, नामिबिया र कंगो लोकतान्त्रिक गणतन्त्रले हालसम्म ४,००० भन्दा बढी गैर कानुनी आप्रवासी र विदेशी अपराधीलाई फिर्ता लिन अस्वीकार गरेको बताइएको छ । 

बेलायतले यी देशहरूलाई सहयोगका लागि एक महिनाको समय दिएको छ। त्यसपछि चरणबद्ध दण्ड लागू हुने जनाइएको छ । सुरुमा भिआइपी तथा कूटनीतिज्ञहरूलाई दिइने छिटो-प्रक्रिया भिसा सेवा हटाइने र अन्त्यमा सबै प्रकारका भिसा पूर्ण रूपमा बन्द गरिने चेतावनी दिएको हो ।

गृहमन्त्री महमूदले भनिन्, “बेलायतमा हामी नियमअनुसार चल्छौँ। अपराधी र गैर कानुनी आप्रवासीलाई फिर्ता नलिने देशहरूलाई दण्डित गरिनेछ भन्ने मैले पहिले नै भनेकी थिएँ। आज मेरो सन्देश स्पष्ट छ, आफ्ना नागरिक फिर्ता लिनुस्, नत्र हाम्रो देशमा प्रवेशको विशेषाधिकार गुमाउनुहोस्।”

यो कदम अमेरिकी राष्ट्रपति डोनाल्ड ट्रम्पले आफ्नो पहिलो कार्यकालमा अफ्रिकी तथा एसियाली केही देशमाथि लागू गरेका प्रतिबन्धसँग मिल्दोजुल्दो मानिएको छ।