प्रकाशित मिति : १४ जेष्ठ २०८३, बिहिबार
राष्ट्रपति डोनाल्ड ट्रम्पमाथि यौन दुर्व्यवहारको आरोप लगाउने पूर्व म्यागजिन स्तम्भकार ई. जीन क्यारोलविरुद्ध अमेरिकी जस्टिस डिपार्टमेन्टले आपराधिक अनुसन्धान सुरु गरेको छ। यस मामिलामा निकट रहेका विभिन्न स्रोतहरूका अनुसार क्यारोलले ट्रम्पविरुद्ध दायर गरेका दुईवटा देवानी मुद्दाको गवाहीका क्रममा झूटो कसम खाएको हो कि होइन भन्ने विषयमा अनुसन्धान केन्द्रित रहेको छ।
क्यारोलले सन् १९९० को दशकको मध्यतिर न्युयोर्कको एक डिपार्टमेन्ट स्टोरमा ट्रम्पले आफूमाथि यौन दुर्व्यवहार गरेको र सन् २०१९ मा ट्रम्पले उक्त आरोपलाई अस्वीकार गर्दै आफ्नो पुस्तकको बिक्री बढाउन कथा बुनेको भनी बदनाम गरेको भन्दै मुद्दा दायर गरेकी थिइन्।
अभियोजकहरूको दाबी सन् २०२२ को एक बयानमा आधारित छ, जसमा ८२ वर्षीया क्यारोलले आफ्नो मुद्दाका लागि बाहिरबाट कुनै आर्थिक सहयोग नलिएको बताएकी थिइन्। तर, पछि अर्बपति रिड हफम्यानले उनको कानुनी शुल्क र खर्चको केही हिस्सा बेहोरेको खुलासा भएको थियो।
यस विषयमा क्यारोलको कानुनी टोलीले कुनै टिप्पणी गर्न अस्वीकार गरेको छ भने बुधबार हफम्यानसँग सम्पर्क गर्ने प्रयास पनि असफल भएको छ। यो अनुसन्धानलाई ट्रम्पका पुराना व्यक्तिगत विरोधीहरूलाई निशाना बनाउने जस्टिस डिपार्टमेन्टले निरन्तर प्रयासको पछिल्लो कडीका रूपमा हेरिएको छ।
कार्यवाहक महान्यायाधिवक्ता टोड ब्लान्चको नेतृत्वमा विभागले ट्रम्पको प्रतिशोधको अभियानलाई तीव्रता दिएको छ, तर अप्रिलमा उनले नेतृत्व सम्हालेयता दर्ता गरिएका मुद्दाहरूको कडा आलोचना भएको छ। यद्यपि, ब्लान्च क्यारोलको पुनरावेदन मुद्दामा ट्रम्पको व्यक्तिगत वकिलका रूपमा कार्यरत रहेकाले यस अनुसन्धान प्रक्रियाबाट उनी बाहिरै रहेका छन्।
जस्टिस डिपार्टमेन्टका वरिष्ठ नेताहरूले यो अनुसन्धान सिकागोका सङ्घीय अभियोजककहाँ पठाएका छन्, किनकि क्यारोलको बयान न्युयोर्कमा भएको भए तापनि आर्थिक सहयोग गर्ने हफम्यानको गैरनाफामूलक संस्था सिकागोमा अवस्थित छ।
सन् २०२२ को भिडियो बयानमा क्यारोलले ट्रम्पकी वकिल अलिना हब्बालाई आफ्नो कानुनी शुल्क कसैले नबेहोरेको बताएकी थिइन्, तर ट्रायल सुरु हुनु दुई हप्ताअघि मात्र उनको टोलीले हफम्यानको संस्थाबाट रकम प्राप्त भएको जानकारी दिएको थियो। ट्रम्पका वकिलहरूले यसलाई ६ महिनासम्म सत्य लुकाउने षड्यन्त्र भएको आरोप लगाएका थिए।
यद्यपि, न्यायाधीश लुइस काप्लानले क्यारोलको विश्वसनीयतामा कुनै समस्या नदेखिएको भन्दै ट्रायलका क्रममा हफम्यानको आर्थिक सहयोगबारे प्रश्न सोध्न रोक लगाएका थिए। हाल जुरीले क्यारोलको पक्षमा फैसला गर्दै ट्रम्पलाई करोडौँ डलर क्षतिपूर्ति तिर्न आदेश दिएको छ, जसको विरुद्धमा ट्रम्पले सर्वोच्च अदालतमा पुनरावेदन गरिरहेका छन्।