प्रकाशित मिति : ३ बैशाख २०८३, बिहिबार
अमेरिकी आप्रवासन तथा भन्सार प्रवर्तन (आइस) का कार्यवाहक निर्देशक टोड लायन्सले राजीनामा दिने भएका छन्। उनी राष्ट्रपति डोनाल्ड ट्रम्पको ठूलो स्तरको देश निकाला (डिपोर्टेसन) योजनाका प्रमुख कार्यान्वयनकर्तामध्ये एक हुन्। लायन्सले मे महिनाको अन्त्यमा पदबाट राजीनामा दिने जानकारी संघीय अधिकारीहरूले दिएका छन्।
गृह सुरक्षा मन्त्री मार्कवेयन मुलिनले लायन्सको बिदाइको घोषणा गर्दै उनलाई आइसका एक उत्कृष्ट नेताका रूपमा प्रशंसा गरे। अमेरिकी समुदायलाई सुरक्षित बनाउन उनले योगदान दिएको मन्त्रीको भनाइ छ। मन्त्री मुलिनले लायन्सको अन्तिम दिन मे ३१ हुने पुष्टि गरेका छन्।
अमेरिकी गृह सुरक्षा मन्त्रालय अर्थात् डिपार्टमेन्ट अफ होमल्याण्ड सेक्युरिटी (डीएचएस) ले राजीनामाका बारेमा कुनै प्रतिक्रिया दिएको छैन।
लायन्सलाई मार्च २०२५ मा कार्यवाहक निर्देशक बनाइएको थियो। उनले राष्ट्रपति ट्रम्पको अमेरिकी आप्रवासन प्रणाली पुनःसंरचना गर्ने योजनाको केन्द्रमा रहेको एजेन्सीको नेतृत्व गरेका थिए। उनको नेतृत्वमा आइसले कंग्रेसबाट ठूलो मात्रामा बजेट प्राप्त गरेको थियो। सो बजेटको प्रयोग कर्मचारी भर्ना विस्तार र हिरासत क्षमता बढाउन गरिएको थियो। साथै, प्रशासनको मागअनुसार गिरफ्तारी पनि बढाइएको थियो।
आइस शिकागो र मिनियापोलिसलगायत अमेरिकी सहरहरूमा भएका उच्च-प्रोफाइल आप्रवासन कार्यान्वयन अभियानको केन्द्रमा थियो। तर, मिनियापोलिसमा संघीय आप्रवासन अधिकारीद्वारा दुई अमेरिकी प्रदर्शनकारीको हत्या भएपछि ती अभियानहरू विवादमा परेका थिए। ह्वाइट हाउसकी प्रवक्ता एबिगेल ज्याक्सनले सामाजिक सञ्जाल एक्समा लायन्सले अमेरिकालाई सुरक्षित बनाउन प्रयास गरेको बताएकी छन्।
लायन्सको स्थानमा को नियुक्त हुने भन्ने अझै स्पष्ट भएको छैन। नयाँ प्रमुखले ठूलो बजेटसहितको तर विवादास्पद एजेन्सीको नेतृत्व सम्हाल्नेछन्।
आइस अहिले कंग्रेसमा पनि विवादको केन्द्रमा छ, जहाँ डेमोक्रेटिक सांसदहरूले गृह सुरक्षा मन्त्रालयको नियमित बजेट स्वीकृत गर्नुअघि कडाइ गर्न माग गरिरहेका छन्। लायन्स सन् २००७ मा टेक्सासमा आप्रवासन प्रवर्तन एजेन्टका रूपमा आइसमा प्रवेश गरेका थिए।