ट्रफी स्पेनको, मन मेसीको: हारपछि पनि चम्किएका अर्जेन्टिनी कप्तान

फोटो :एपी/रासस

विश्वकप २०२६ को फाइनलमा स्पेनसँग १–० ले पराजित भएपछि अर्जेन्टिनी फुटबल संघ (एएफए) ले कप्तान लियोनेल मेसीलाई समर्पित गर्दै सामाजिक सञ्जाल ‘एक्स’मा पोस्ट गरेको भावुक सन्देशले विश्वभरका समर्थकको मन छोएको छ।

एएफएले आफ्नो भावुक सन्देशमा लेखेको छ, “तिम्रा आँसु हाम्रा आँसु हुन्, कप्तान। तिमीले हामीलाई जीवनका सबैभन्दा खुसीका क्षणहरू दियौ। अन्तिम सेकेन्डसम्म देशका लागि सबैथोक समर्पण गरेकोमा धन्यवाद। हामीलाई तिमीमाथि सधैं गर्व रहनेछ। हामी तिमीलाई सधैं माया गरिरहनेछौ, लियो।”

ट्रफी हात पार्न नसके पनि मेसी यो विश्वकपका सबैभन्दा चर्चित र सम्मानित खेलाडी बने। मैदानमा उनको प्रदर्शन, नेतृत्व क्षमता र हारलाई समेत गरिमापूर्ण ढङ्गले स्वीकार गर्ने शैलीले उनलाई फेरि एकपटक फुटबल जगतको केन्द्रमा पुर्यायो।

कतार विश्वकप २०२२ मा अर्जेन्टिनालाई विश्वविजेता बनाउँदा खुसीका आँसु बगाएका मेसी यसपटक भने स्पेनसँगको हारपछि भावुक देखिए। तर जित र हार दुवै अवस्थामा उनले देखाएको संयमता र खेलभावनाले उनलाई लाखौँ समर्थकको अझ प्रिय बनायो।

३९ वर्षीय मेसीले प्रतियोगिताभर उत्कृष्ट प्रदर्शन गर्दै ८ गोल गरे भने ४ गोलका लागि अवसर सिर्जना गरे। सात खेलमा अर्जेन्टिनाले गरेका कुल १२ गोलमध्ये उनी प्रत्यक्ष रूपमा सबै (१२ वटै) गोलमा संलग्न रहे। उनको यही उत्कृष्ट प्रदर्शनकै बलमा अर्जेन्टिना लगातार दोस्रो पटक विश्वकपको फाइनलमा पुग्न सफल भयो। यो मेसीको करियरको तेस्रो विश्वकप फाइनल पनि थियो।

तर न्युजर्सीस्थित मेटलाइफ स्टेडियममा भएको उपाधि भिडन्तमा अर्जेन्टिनाको सपना अधुरै रह्यो। अतिरिक्त समयको दोस्रो हाफ सुरु भएको मात्र ३७ सेकेन्डमा फेरान टोरेसले गरेको निर्णायक गोल नै स्पेनको ऐतिहासिक जितको आधार बन्यो। स्पेनले १–० को जित निकाल्दै दोस्रो पटक विश्वकप उपाधि जित्यो भने अर्जेन्टिनाको लगातार दोस्रो पटक विश्वकप जित्ने सपना समाप्त भयो।

यदि अर्जेन्टिनाले उपाधि जितेको भए, सन् १९६२ पछि लगातार दुई पुरुष विश्वकप जित्ने पहिलो राष्ट्र बन्ने थियो। तर स्पेनले त्यो इतिहास बन्न दिएन।

पराजयपछि अर्जेन्टिनाका मुख्य प्रशिक्षक लियोनेल स्कालोनीले मेसीको खुलेर प्रशंसा गरे। उनले भने, “मलाई विश्वास छ, सबैले मेसी र उनले हासिल गरेका उपलब्धिहरूमाथि गर्व गर्नेछन्। मेरो विचारमा उनी मैदानमा खेलेका सबैभन्दा महान फुटबलर हुन्।”

अब सबैको चासो मेसीको अन्तर्राष्ट्रिय भविष्यतर्फ केन्द्रित भएको छ। उनले यसअघि कतार विश्वकप नै आफ्नो अन्तिम विश्वकप हुने बताएका थिए। तर त्यसपछि पनि उनले विश्वकप २०२६ खेले र विश्वकप इतिहासमा लगातार छ संस्करण खेल्ने पहिलो फुटबलर बने।

यद्यपि, अब उनले अर्जेन्टिनाको जर्सीमा निरन्तरता दिने वा नदिने विषयमा कुनै निर्णय सार्वजनिक गरेका छैनन्। प्रशिक्षक स्कालोनीले पनि यसबारे आफूले मेसीसँग कुनै छलफल नगरेको बताए। फाइनलपछि मेसीसहित अर्जेन्टिनाका खेलाडीहरूले सञ्चारकर्मीसामु कुनै प्रतिक्रिया दिएनन्।

हारमा पनि उस्तै सम्मान

८० हजारभन्दा बढी दर्शक क्षमताको मेटलाइफ स्टेडियममा अधिकांश समर्थक मेसीलाई दोस्रो पटक विश्वविजेता बनेको हेर्न चाहन्थे। तर अन्तिम परिणाम उनीहरूको चाहनाअनुसार आएन।

खेलपछि आँखा रसाएका मेसी आफ्ना टोलीका साथीहरूसँग अर्जेन्टिनी समर्थकहरूलाई अभिवादन गरिरहेका थिए। समर्थकहरूले लामो समयसम्म ताली बजाउँदै आफ्नो कप्तानलाई सम्मान अर्पण गरे। त्यही समयमा मैदानको अर्को छेउमा स्पेनका खेलाडीहरू विश्वकप ट्रफी उचालेर उत्सव मनाइरहेका थिए।

धेरै महान खेलाडीहरूले संन्यास लिइसकेने उमेरमा पनि मेसी मैदानमा उत्रँदा दर्शकहरू उभिएर सम्मान प्रकट गर्छन्। विश्वकपभर उनले फेरि एकपटक आफ्नो खेल, धैर्य र नेतृत्व क्षमताले किन आफूलाई फुटबल इतिहासकै महान खेलाडी मानिन्छ भन्ने कुरा प्रमाणित गरे।

कहिल्यै हार नमान्ने सन्देश

विश्वकप २०२६ मा अर्जेन्टिनाले कठिन परिस्थितिबाट पटक–पटक पुनरागमन गर्यो। केप भर्डेविरुद्धको बराबरी, इजिप्टविरुद्ध दुई गोलले पछि परेको अवस्था तथा सेमिफाइनलमा इंग्ल्यान्डविरुद्ध अन्तिम समयमा गरिएको उत्कृष्ट पुनरागमनले टोलीलाई फाइनलसम्म पुर्याएको थियो।

यी सबै खेलमा अर्जेन्टिनाले हतार वा आत्तिनुभन्दा धैर्य, बल नियन्त्रण र योजनाबद्ध खेलमार्फत सफलता हासिल गर्यो। त्यसको केन्द्रमा कप्तान मेसी नै थिए।

इंग्ल्यान्डविरुद्धको सेमिफाइनल जितपछि मेसीले भनेका थिए, “सबै कुरा जसरी भइरहेको छ, त्यो अविश्वसनीय छ। विश्वकप सुरु हुनुअघि नै मलाई यो टोलीमाथि पूर्ण विश्वास थियो। हामी अन्तिम चारमा पुग्नेछौँ र उपाधिका लागि लड्नेछौँ भन्ने विश्वास थियो। अहिले हामी फाइनलमा पुगेका छौँ।”

ट्रफीभन्दा ठूलो विरासत

विश्वकपको उत्कृष्ट खेलाडीलाई प्रदान गरिने ‘गोल्डेन बल’ यसपटक स्पेनका कप्तान रोड्रीले जिते, जसलाई धेरैले योग्य विजेता मानेका छन्। तर प्रतियोगिताभर मेसीले देखाएको नेतृत्व, निरन्तर उत्कृष्ट प्रदर्शन र खेलप्रतिको समर्पणले उनलाई समर्थकहरूको नजरमा सबैभन्दा ठूलो नायक बनायो।

झण्डै चार दशकको उमेरमा पनि विश्व फुटबलको सर्वोच्च स्तरमा निरन्तर उत्कृष्ट प्रदर्शन गर्नु आफैँमा असाधारण उपलब्धि हो। उनले आफ्नो सम्पूर्ण यात्रामार्फत एउटा सन्देश दिए— कहिल्यै हार नमान, अन्तिम क्षणसम्म संघर्ष गर।

यदि अर्जेन्टिनाको जर्सीमा मेसीको यो अन्तिम विश्वकप थियो भने, उपाधि हात नपरे पनि उनले संसारभरका करोडौँ समर्थकको मन जितेर अविस्मरणीय बिदाइ लिएका छन्। त्यसैले विश्वकप २०२६ को ट्रफी स्पेनले जिते पनि प्रतियोगिताको सबैभन्दा ठूलो भावनात्मक नायक भने लियोनेल मेसी नै बने। (एजेन्सीहरूको सहयोगमा )