प्रकाशित मिति : श्रावण १८, २०८१ शुक्रबार
टेक्सासको ग्यास स्टेशनमा लुटेराबाट गोली हानी मारिएका नेपाली ३० बर्षका दिपक ओलीको अन्त्येष्टी आइतबार टेक्सासमै गरिने भएको छ । टेक्सासको एल्जिनमा रहेको प्रोभिडेन्स जोन्स फेमिली फ्युनरल होममा विहान ९ बजे अन्त्येष्टी गरिने जनाइएको छ ।
ओलीका नेपालमा ५ बर्षका छोरी दीपीका ओली र २६ बर्षकी बिमला बुढाथोकी रहेका छन् । गतबर्षमात्र दलाललाई लाखौं रुपिया बुझाएर मेक्सिको हुँदा विना भिसा अमेरिका आएका पश्चिम रुकुमको बाफिकोटका ओलीको अमेरिकी सपना गत आइतबार विहानको गोलीकाण्डसँगै समाप्त भएको हो । उनको परिवारमा अझै अमेरिका आउँदाको ४० लाख ऋण बाँकी रहेको पारिवारिक श्रोतको भनाई छ ।
नेपालमा रहेका बुबा लाल ओली, आमा प्रतिभा कुसारी, पत्नी र छोरीलाई वियोगमा छाडेर भौतिक संसार छाडेका ओलीको दाहसंस्कार र परिवारको सहयोगका लागि गोफण्डमीमा आर्थिक अभियान चलाइएको छ । जसमा यो समाचार तयार पार्दासम्म ४३ हजार ३ सय ९४ डलर संकलन भएको छ । ओलीप्रति श्रद्धाञ्जली र परिवारजनप्रति समवेदना व्यक्त गर्दै ६५ हजार डलरको लक्ष्यसहित सुरु गरिएको उक्त गोफण्डमी सहयोग गर्न अपिल गरिएको छ ।
सहयोगका लागि यहाँ क्लीक गर्नुहोला।
आइतबार विहान एल्म मोटको आई ३५ र रस रोड नर्थमा रहेको गेटोर स्टप ३ मा उक्त घटना भएको हो । ओलीले स्टोरमा क्यासियरका रुपमा काम गर्दै आएका थिए ।
बिहान ५ बजेको समयमा ओली कार्यरत ग्याँस स्टेशनमा आएका दुई लुटेराले गोली हानेका थिए । एक जना श्वेत र अर्का अश्वेत लुटेराहरुले स्टोरमा पसेर गोली प्रहार हानेको र ओलीको घटनास्थलमै निधन भएको थियो ।
अमेरिकाका ग्यास स्टेशनहरुमा लुटेराहरुको आक्रमणमा ज्यान गुमाउने र घाइते हुने नेपालीहरुको संख्या उल्लेख्य रहेको छ । प्राय यस्ता घटनाहरु रातीको समयमा हुने गरेका छन् ।
गतबर्ष अमेरिकाको कोलोराडोमा आफ्नै स्टोरमा काम गर्दै आएका नेपाली भेषराज लामिछानेको बन्दुकधारीद्धारा गोली हानी हत्या भएको थियो । लामिछानेलाई हुईटरीज, कोलोराडोको कन्भिनियन्स स्टोरमा काम गरिरहेको अबस्थामा गोली हानी हत्या गरिएको थियो ।
गतबर्ष नै टेक्सासको युलेसमा बस्दै आएका नेपाली युवा दिपेन्द्र जोशी ग्यास स्टेशनमा काम गरेर फर्कदा गोली लागी घाइते भएका थिए । त्यस्तै गतबर्ष नै टेक्सासको अष्टिनमा ग्यास स्टेशनमा काम गरिरहेका बेला हतियारधारी लुटेराको समुहले ३२ बर्षका भिम बहादुर नाथमाथि गोली प्रहार गर्दा उनी सख्त घाइते भएका थिए ।