प्रकाशित मिति : माघ २२, २०८१ मंगलबार
चीनले अमेरिकाबाट आयात हुने कोइला र तरलीकृत प्राकृतिक ग्यासमा १५ प्रतिशत भन्सार दर लगाउने बताएको छ ।
बेइजिङको वित्त मन्त्रालयले अमेरिकाबाट कच्चा तेल, कृषि मेसिनरी, ठूला विस्थापन सवारी साधन र पिकअप ट्रकको आयातमा १० प्रतिशत भन्सार महसुल लगाउने पनि घोषणा गरेको छ ।
बेइजिङका अनुसार नयाँ उपायहरू अमेरिकाले लगाएको ‘एकतर्फी भन्सार दर वृद्धि’ को प्रतिक्रियामा आएका हुन् ।
अमेरिकी राष्ट्रपति डोनाल्ड ट्रम्पले शनिबार चीनबाट आउने सामानहरूले उनीहरूले पहिले नै वहन गरेको भन्सार दरमाथि थप १० प्रतिशत भन्सार दर लगाइने घोषणा गरेका थिए ।
गैरकानूनी आप्रवासी र फेन्टानिलसहितका लागुऔषधको अमेरिकामा प्रवाह रोक्न असफल भएका देशहरूलाई सजाय दिने उद्देश्यले यी कदमहरू चालिएको ट्रम्पले बताएका छन ।
चीनले अमेरिकी कदमले विश्व व्यापार सङ्गठनका नियमहरूको गम्भीर उल्लङ्घन गरेको बताएको छ ।
अर्को सोमबारदेखि लागु हुने चीनको करको घोषणा ट्रम्पले आगामी २४ घन्टामा राष्ट्रपति सी जिनपिङसँग फोनमा कुरा गर्ने घोषणा गरेको केही समयपछि गरिएको हो ।
क्यानाडा, चीन र मेक्सिको अमेरिकाका तीन सबैभन्दा ठूला व्यापारिक साझेदार हुन् । यो व्यापार युद्ध होइन, यो लागुऔषधको युद्ध हो भनेर अमेरिकाले बताउदै आएको छ ।
क्यानडा , चीन र मेक्सिको बिरुद्ध सँगसँगै सीमा शुल्क घोषणा गरेपछि क्यानडा र मेक्सिकोलाई ट्रम्पले एक महिना सुधारका लागि समय दिएका छन । तर चीनबिरुद्ध १० प्रतिशत थप आयात शुल्क भने कार्यन्वयन हुने उनले बताए ।
चिनियाँ समकक्षीसँग ह्ुने बार्ता सफल नभएकामा यो दर अझै बढ्नसक्ने ट्रम्पले संकेत गरेका छन ।