चिनियाँ सामानहरूमा अतिरिक्त १० प्रतिशत कर लगाउने ट्रम्पको घोषणा

प्रकाशित मिति : मंसिर १०, २०८१ सोमबार

राष्ट्रपति निर्वाचित डोनाल्ड ट्रम्पले चिनियाँ सामानहरूमा अतिरिक्त १० प्रतिशत कर लगाउने योजना अघि सार्नु भएको छ । यो घोषणासँगै उहाँले आफ्ना सामाजिक सञ्जाल प्लेटफर्म ट्रुथ सोसलमा पोस्ट गर्नुभएको हो ।

जनवरी २० मा उहाँले गर्ने पहिलो कार्यकारी आदेशहरूले मेक्सिको र क्यानडाबाट आउने सबै सामानहरूमा २५ प्रतिशत कर लगाउनेछ । यस्तो कदमले क्षेत्रीय स्वतन्त्र व्यापार सम्झौतामा अन्त्य ल्याउनेछ ।

ट्रम्प जनवरी २० मा अमेरिकाको नयाँ राष्ट्रपति बन्ने तयारीमा रहनु भएको छ । उहाँले अवैध आप्रवासन र गैरकानूनी लागुऔषध व्यापारलाई ती करको मुख्य कारण बताउँदै भन्नुभएको छ ।

मैले चीनसँग धेरै पटक कुरा गरेको छु, विशेष गरी फेन्टानिल जस्ता ठूलो मात्रामा लागुऔषधहरू अमेरिकामा पठाउने विषयमा तर कुनै नतिजा आएन ट्रम्पले भन्नुभयो । उहाँले चीनले वाचा गरेजस्तो लागुऔषध बेच्नेहरूलाई मृत्युदण्ड दिने काम गरेको छैन भन्नुभएको छ ।

फेन्टानिल एउटा सिंथेटिक ओपिओइड हो । जसले अमेरिकामा हरेक वर्ष हजारौं ओभरडोजका कारण मृत्यु निम्त्याएको छ । यो लागुऔषधको अवैध आपूर्तिलाई कम गर्नु आबश्यक छ । यसका मुख्य सामग्रीहरू चीन र मेक्सिकोमा उत्पादित हुन्छन् ।

लागुऔषधहरू मेक्सिको हुँदै अमेरिका भित्रिरहेको भन्दै उहाँले जबसम्म यसलाई रोकिन्न, त्यसबेला सम्म चीनबाट आउने सबै सामानहरूमा कुनै पनि अन्य करहरूका साथै अतिरिक्त १० प्रतिशत कर लगाउने ट्रम्पले स्पष्ट पार्नुभयो ।

राष्ट्रपति पदको चुनाव प्रचारका क्रममा ट्रम्पले चिनियाँ सामानमा ६० प्रतिशत करको धम्की दिनुभएको थियो । १० प्रतिशत कर भने बजारहरूले अपेक्षा गरेको २० देखि ३० प्रतिशत को तुलनामा कम हो ।

सेप्टेम्बरको अमेरिकी तथ्यांकअनुसार मेक्सिको अमेरिकाको सबैभन्दा ठूलो व्यापारिक साझेदार हो । त्यसपछि क्यानडा र चीन छन् । चीनको भन्सार तथ्यांकअनुसार अमेरिका एकल देशको आधारमा चीनको सबैभन्दा ठूलो व्यापारिक साझेदार हो ।