अमेरिकाद्वारा युरोपेली युनियनका पूर्व आयुक्तसहित पाँच जनालाई भिसा दिन अस्वीकार

अमेरिकाले युरोपेली संघ (ईयू) का पूर्व आयुक्तसहित पाँच जनालाई भिसा दिन अस्वीकार गरेको छ। अमेरिकी सामाजिक सञ्जाल प्लेटफर्महरूलाई आफूले नचाहेका विचारहरू दबाउन ‘जबरजस्ती’ गरेको आरोप लगाउँदै विदेश मन्त्रालयले यो निर्णय गरेको हो।

विदेशमन्त्री मार्को रुबियोका अनुसार, अमेरिका र अमेरिकी कम्पनीहरूका विरुद्ध लाग्ने ‘कट्टरपन्थी’हरूलाई कडाइ गर्न यो कदम चालिएको हो। युरोपेली आयोगका पूर्व शीर्ष प्रविधि नियामक थिएरी ब्रेटनले यसलाई आफूविरुद्धको षडयन्त्र भएको बताएका छन्।

अमेरिकी विदेश मन्त्रालयले उनलाई ईयूको ‘डिजिटल सर्भिसेज एक्ट’ को मुख्य योजनाकार मानेको छ। यो कानुनलाई अमेरिकाका केही रूढीवादी समूहहरूले दक्षिणपन्थी विचार दबाउने अस्त्रका रूपमा हेरेका छन्, जसलाई ब्रसेल्सले भने अस्वीकार गर्दै आएको छ।

ब्रेटन र ‘एक्स’ (पूर्व ट्विटर) का मालिक एलन मस्कबीच ईयू नियम पालनाको विषयमा लामो समयदेखि विवाद चल्दै आएको छ। हालै युरोपेली आयोगले ‘ब्लु टिक’ प्रणालीलाई “भ्रामक” भन्दै एक्समाथि १२० मिलियन युरो जरिवाना गरेको थियो। यसको बदलामा एक्सले आयोगका विज्ञापनहरू आफ्नो प्लेटफर्ममा रोक लगाएको छ।

बेलायतस्थित ‘ग्लोबल डिसइन्फर्मेसन इन्डेक्स’ की प्रमुख उनक्लेयर मेल्फोर्डलाई अमेरिकी प्रेस र अभिव्यक्ति स्वतन्त्रतालाई ‘कालोसूची’मा राख्न उक्साएको आरोप लगाइएको छ।

‘सेन्टर फर काउन्टरिङ डिजिटल हेट’का प्रमुख इमरान अहमदलाई अमेरिकी नागरिकविरुद्ध सरकारलाई हतियारका रूपमा प्रयोग गर्न खोजेको आरोप छ।

विदेशमन्त्री रुबियोले “विश्वव्यापी सेन्सरशिप–उद्योगका एजेन्टहरू” माथि भिसा प्रतिबन्ध लगाइएको र उनीहरूलाई अमेरिका प्रवेशमा रोक लगाइने स्पष्ट पारेका छन्।

उनले राष्ट्रपति ट्रम्पको ‘अमेरिका फर्स्ट’ नीतिले अमेरिकी सार्वभौमिकतामाथि हुने कुनै पनि हस्तक्षेप स्वीकार नगर्ने बताएका छन्।

अर्कोतर्फ, प्रतिबन्धित व्यक्ति र संस्थाहरूले यस कदमलाई अभिव्यक्ति स्वतन्त्रतामाथिको हमला र आलोचकहरूलाई चुप गराउने दमनकारी प्रयास भनेका छन्।