प्रकाशित मिति : असार २७, २०८१ बिहीबार
ट्रम्पसँगको बहसमा कमजोर प्रस्तुतीपछि पहिलोपटक एकघण्टा लामो पत्रकार सम्मेलनमा उपस्थीत हुँदै जो बाइडेनले राष्ट्रपतिका लागि चुनावी दौड नछाड्ने जिद्दी गरेका छन् । राष्ट्रपति बाइडेनले दौडबाट बाहिरिने कुनै संकेत दिएनन् बरु काम पूरा गर्ने वाचा गरेका छन् ।
राष्ट्रपति बाइडेनले बिहीबार करिब घण्टा लामो पत्रकार सम्मेलनमा पत्रकारहरूका प्रश्नहरूको श्रृंखलाबद्ध जवाफ दिएका थिए । बाइडेनका कतिपय जवाफ अस्थीर खालका भएतापनि उनले पत्रकारसम्मेलनमा विदेश नीतिबारे कमाण्ड पनि प्रदर्शन । साथै दुई हप्ता अघि राष्ट्रपति उम्मेदबारको बहसको जस्तो खराब क्षण भने दोहोराएनन् ।
सुरुमा टेलिप्रम्प्टरबाट पढेपछि र चुनावी दौडमा रहने आफ्नो वाचा दोहोर्याएपछि बाइडेनले आफ्नो उमेर र फिटनेसको बारेमा केही प्रश्नहरू खण्डन गर्न खोजेका थिए । तर एक बिन्दुमा उपराष्ट्रपति कमला ह्यारिसको बारेमा एउटा प्रश्नमा भने चिप्लिए । उनले उपराष्ट्रपति ह्यारिस भन्नुपर्ने ठाउँमा उपराष्ट्रपति ट्रम्प भनेका थिए । यस अगाडि बाइडेनले नेटो बैठकमा पनि युक्रेनका राष्ट्रपति भोलोडिमिर जेलेन्स्कीलाई राष्ट्रपति पुटिन भनी परिचय दिएका थिए ।
आजको एकल पत्रकार सम्मेलन पूर्व राष्ट्रपति डोनाल्ड ट्रम्पको सामना गर्न बाइडेन आवश्यक रुपमा फुर्तिलो र सक्षम छन् भनेर प्रदर्शन गर्न डिजाइन गरिएको थियो। बाइडेनमाथि उम्मेदवारी अन्त्य गर्न मनाउने प्रयासबारे विचार भइरहेको बेलामा उनी पत्रकारहरूसामु उभिएका हुन् ।
बाइडेनमा विश्व मंचमा आफ्ना उपलब्धिहरूको बारेमा गर्व गर्दै र पूर्व राष्ट्रपति डोनाल्ड जे ट्रम्पलाई आक्रमण गर्दै आफ्नो पत्रकार सम्मेलन सुरु गरेका थिए । बाइडेनले अमेरिकामा मुद्रास्फीतिमा आएको गिरावटलाई उल्लेख गरे भने गाजामा युद्धको अन्त्यका लागि हमास र इजरायलले सम्झौता पूरा गर्न सक्नेमा आशावादी रहेको बताए।
पत्रकारहरूका धेरैजसो प्रश्नहरू डेमोक्र्याट्सहरुले उनलाई चुनावी मैदानबाट। हट्नको लागि गरेका आह्वान सम्बन्धित थिए । तर बाइडेनले चुनावी मैदानबाट हट्ने कुरा अस्वीकार गर्दै आफू काम गर्नको लागि उत्तम योग्य व्यक्ति भएको बताए । सर्वेक्षणले बाइडेनको साटो अन्य उम्मेदबारले ट्रम्पलाई हराउनसक्ने देखाएको बाइडेनले स्वीकार गरेतापनि अब सुरुबाट प्रारम्भ गर्न गाह्रो भएको उल्लेख गरे ।