प्रकाशित मिति : १० चैत्र २०८२, मंगलबार
इरानमा राष्ट्रिय सुरक्षालाई कमजोर पार्ने उद्देश्यका अनलाइन गतिविधिमा संलग्न भएको आरोपमा ४६६ जनालाई पक्राउ गरिएको छ। सरकारी सञ्चारमाध्यमहरूले मंगलबार जनाएअनुसार इजरायल र अमेरिकासँगको युद्ध सुरु भएयता गरिएको यो सबैभन्दा ठूलो सुरक्षा कारबाहीमध्ये एक हो।
स्थानीय सञ्चारमाध्यमहरूका अनुसार पछिल्लो एक महिनामा मात्रै १,००० भन्दा बढी व्यक्तिलाई यस्तै आरोपमा नियन्त्रणमा लिइएको छ। पक्राउ परेकाहरूले संवेदनशील स्थानहरूको भिडियो खिच्ने, सरकारविरुद्ध सामग्री सामाजिक सञ्जालमा फैलाउने तथा शत्रुसँग सहकार्य गरेको आरोप लागेका छन्।
प्रहरीले जारी गरेको विज्ञप्तिमा हालैका दिनहरूमा गरिएको गुप्तचर तथा प्राविधिक निगरानीका आधारमा यी कारबाही गरिएको उल्लेख छ। विज्ञप्तिमा पक्राउ परेका व्यक्तिहरू शत्रु सञ्जालसँग जोडिएको र देशभित्र अस्थिरता सिर्जना गर्ने प्रयासमा रहेको दाबी गरिएको छ।