प्रकाशित मिति : कार्तिक १४, २०८२ शुक्रबार
अमेरिकाबाट आयरल्यान्डका नागरिकको निष्कासन दरमा ५० प्रतिशतभन्दा बढीले वृद्धि भएको छ।
२०२५ को पहिलो नौ महिनाभित्र अमेरिकाबाट निष्कासित गरिएका आयरल्यान्डका नागरिकहरूको सङ्ख्या गत वर्षको सोही अवधिको तुलनामा ५० प्रतिशतभन्दा बढीले बढेको देखिएको छ।
अमेरिकी इमिग्रेशन एन्ड कस्टम्स इनफोर्समेन्ट(आइस) को तथ्याङ्कअनुसार जनवरीदेखि सेप्टेम्बर २०२५ सम्ममा ९९ जना आयरल्यान्डका नागरिकलाई अमेरिकाबाट डिपोर्ट गरिएको छ। २०२४ को अक्टोबरदेखि २०२५ को सेप्टेम्बरसम्मको १२ महिनाको अवधिमा यो सङ्ख्या ६० मात्र रहेको थियो।
अमेरिकी अध्यागमन (इमिग्रेशन) वकिलका अनुसार राष्ट्रपति डोनाल्ड ट्रम्पको दोस्रो कार्यकालको सुरुआतसँगै निष्कासन दर तीव्र रूपमा अघि बढेको छ।
आइस का प्रवक्ताले कानुनी रूपमा अमेरिकाभित्र रहेका र अध्यागमन कानुनको उल्लङ्घन वा आपराधिक कार्य नगरेका व्यक्तिहरूले कुनै डर मान्नुपर्ने अवस्था नरहेको बताएका छन्।
तर, अध्यागमन वकिल क्लेयर डउट्रेले हाल अपराध नगरेका व्यक्तिहरू पनि पक्राउ पर्न थालेको बताएकी छिन्। वर्षौंदेखि बसिरहेका र आपराधिक पृष्ठभूमि नभएका मानिसहरू समेत पक्राउ परिरहेको उनले बताइन्।
उनका अनुसार धेरैजसोले भिसा लिएर वैध रूपमा अमेरिका प्रवेश गरेका थिए, तर पछि भिसा अवधि सकिएपछि अवैध रूपमा बसेका थिए। “अहिले सबै नै जोखिममा छन्,” उनले थपिन्।
अमेरिकी नेवीका पूर्व सैनिक जिम ब्राउनकी श्रीमती डोना ह्यूजेस–ब्राउनलाई दुई दशकअघिका साना आर्थिक अपराधका कारण निष्कासनको सामना गर्नुपरेको छ। डोना १९७० को दशकमा बाल्यकालमै आफ्ना अभिभावकसँग अमेरिका आएकी थिइन्। हाल उनी दुईवटा खराब चेक लेखेको कारण जेलमा छिन्।
आयरल्यान्डको परराष्ट्र मन्त्रालयका अनुसार २०२५ को जनवरीदेखि सेप्टेम्बरसम्म ५१ जना आयरल्यान्डका नागरिकले निष्कासनसम्बन्धी दूतावास सहयोग मागेका छन्, जुन गत वर्षको १५ भन्दा ठूलो वृद्धि हो।
अमेरिकी सरकारका अनुसार अपराध गर्ने, सार्वजनिक सुरक्षामा खतरा पुऱ्याउने, वा भिसा सर्त उल्लङ्घन गर्ने गैर-नागरिकहरूलाई हिरासतमा लिई निष्कासित गरिन्छ।