प्रकाशित मिति : असार १९, २०८२ बिहीबार
The US Capitol is seen in Washington, DC, on December 20, 2024. The US House of Representatives voted on December 20 to avert a government shutdown with just hours to spare, with Democrats joining Republicans to advance a funding bill keeping the lights on through mid-March. Lawmakers sent a package to the Senate that would keep federal agencies running through mid-March — but the upper chamber only has until midnight (0500 GMT) to follow suit or federal agencies will begin shutting. (Photo by Richard PIERRIN / AFP)
अमेरिकी राष्ट्रपति डोनाल्ड ट्रम्पको दोस्रो कार्यकालको सबैभन्दा ठूलो विधेयक ‘मेगाबिल’ अमेरिकी सिनेट र प्रतिनिधि सभाबाट पारित भएको छ। सिनेटमा नाटकीय संघर्षपछि बुधबार राति विधेयक पारित भएपछि बिहीबार बिहान प्रतिनिधि सभाले पनि झिनो मतान्तरले पारित गरेको हो। अब यो विधेयक राष्ट्रपतिको हस्ताक्षरका लागि ह्वाइट हाउस पठाइएको छ।
सिनेटमा विधेयक पारित गर्न रिपब्लिकनहरूमाझ मत विभाजन हुँदा उपराष्ट्रपति जेडी भान्सले टाईब्रेकिङ मतदान गरेका थिए। पचास–पचास मत आएपछि भान्सको निर्णायक मतदानले विधेयक ५१ मतले पारित भयो। त्यसपछि बिहीबार बिहान प्रतिनिधि सभामा २१८–२१४ को मतान्तरले विधेयक पारित गरिएको हो। रिपब्लिकन सिनेटरहरू सुसान कोलिन्स, थोम टिलिस र रान्ड पलले डेमोक्र्याटहरूसँग मिलेर विधेयकको विपक्षमा मतदान गरेका थिए। ट्रम्प प्रशासनले स्वतन्त्रता दिवस जुलाई ४ भन्दा अगाडि विधेयक पारित गर्ने लक्ष्य राखेको थियो र उक्त लक्ष्य हासिल भएको छ।
विधेयकले अमेरिकी कर प्रणाली, संघीय खर्च र सामाजिक सुरक्षा नीतिहरूमा व्यापक परिवर्तन ल्याउनेछ। यसले ट्रम्पको पहिलो कार्यकालमा २०१७ मा गरिएको कर कटौती विस्तार गर्दै झन्डै ३.८ ट्रिलियन डलरको नयाँ कर छुट व्यवस्था गर्नेछ। बाल कर क्रेडिट विस्तार, वृद्ध नागरिकहरूका लागि मानक कटौती बढाउने, र अमेरिकामा बनेका कार खरिदकर्तालाई कर छुट दिने प्रावधानहरू विधेयकमा समावेश छन्। सेवा क्षेत्रमा कार्यरत श्रमिकहरूलाई राहत दिनेगरी टिप्स र ओभरटाइम आम्दानीमा आंशिक कर छुटको व्यवस्था गरिएको छ। राज्य र स्थानीय कर कटौतीको सीमा १० हजार डलरबाट बढाएर ४० हजार डलर पुर्याउने निर्णय गरिएको छ।
संघीय बजेट विनियोजनको सन्दर्भमा विधेयकले सीमा सुरक्षा र अध्यागमन नियन्त्रणमा करिब १५० अर्ब डलर खर्च गर्नेछ। सैन्य खर्चमा समेत १५० अर्ब डलर थप्ने व्यवस्था गरिएको छ। मेडिकेड र अन्य स्वास्थ्य कार्यक्रमहरूमा झन्डै ९३० अर्ब डलरको कटौती गरिनेछ, जसका कारण २०३४ सम्म ११ देखि १२ मिलियन अमेरिकी नागरिक बीमाविहीन हुने प्रक्षेपण गरिएको छ। मेडिकेड पाउनका लागि कडा मापदण्ड लागू गरिनेछ र राज्यहरूले यसको लागि अपनाउने रणनीतिहरूमा समेत नयाँ प्रतिबन्ध लगाइनेछ।
खाद्य सहायता कार्यक्रममा सहभागी हुने व्यक्तिहरूलाई नयाँ कामको आवश्यकताको पालना गर्नुपर्नेछ। साथै, केही राज्यहरूले पहिलो पटक उक्त कार्यक्रमका लागि खर्चको केही हिस्सा बेहोर्नुपर्ने व्यवस्था गरिएको छ। स्वच्छ ऊर्जा प्रवर्द्धन गर्न बाइडेन प्रशासनले ल्याएका कर क्रेडिटहरू—जसमा सौर्य र वायु ऊर्जा फार्महरू, विद्युतीय सवारी साधन र हाइड्रोजन इन्धन निर्माता कम्पनीहरू समेटिएका छन्— तीव्र रूपमा कटौती गरिनेछ।
विधेयकले आगामी १० वर्षमा संघीय घाटामा करिब ३.३ ट्रिलियन डलर थप गर्ने प्रक्षेपण गरिएको छ। यो प्रतिनिधि सभाबाट पारित अघिल्लो संस्करणको अनुमानित लागत २.४ ट्रिलियन डलरभन्दा धेरै हो। सिनेट र प्रतिनिधि सभा दुवैबाट पारित भइसकेपछि विधेयक राष्ट्रपति ट्रम्पको हस्ताक्षरका लागि पठाइएको छ। स्वतन्त्रता दिवसको पूर्वसन्ध्यामा यसमा हस्ताक्षर गरी यसलाई कानुनी मान्यता दिइने अपेक्षा गरिएको छ। यो विधेयक अमेरिकी अर्थतन्त्र, समाजिक सुरक्षा संरचना र नीति निर्माण प्रक्रियामा दीर्घकालीन असर पार्ने अनुमान गरिएको छ।