प्रकाशित मिति : भाद्र ११, २०८२ बिहीबार
अमेरिकी राष्ट्रिय गुप्तचर निर्देशक तुल्सी गब्बार्डले अचानक एकजना सीआईए विज्ञलाई पदमुक्त गरेकी छिन्।
राष्ट्रपति डोनाल्ड ट्रम्पले अलास्कामा रुसी राष्ट्रपति भ्लादिमिर पुटिनसँग भेट गरेको केही समयपछि यो खबर बाहिर आएको हो। पदमुक्त गरिएका ती अधिकारीको नाम भने सार्वजनिक गरिएको छैन।
ती विज्ञले ट्रम्पको टोलीलाई वार्ताका विषयमा पूर्वजानकारी दिने तयारीमा सहयोग गरेका थिए।
गत हप्ता गब्बार्डले जारी गरेको विज्ञप्तिमा केही बहालवाला र पूर्व गुप्तचर अधिकारीहरूको सुरक्षा अनुमति खारेज गर्ने घोषणा गरेकी थिइन्।
गब्बार्डका निकटस्थ व्यक्तिले भने ती अधिकारी पहिले नै सार्वजनिक रूपमा सीआईए-सँग आबद्ध भइसकेको दाबी गरेका छन्।
तर सामान्यतया सीआईए अधिकारीहरूले आफ्नो भूमिकाअनुसार “कभर” भित्र र बाहिर दुवै प्रकारका जिम्मेवारी वहन गर्ने प्रचलन हुन्छ।
राष्ट्रिय गुप्तचर निर्देशककी प्रवक्ताले भनिन्, “निर्देशक गब्बार्डले देशलाई धोका दिने, गुप्त जानकारीलाई राजनीतिकरण गर्ने, हतियारको रूपमा प्रयोग गर्ने वा चुहाउने व्यक्तिहरूलाई रोक्न सुरक्षा अनुमति खारेज गरेकी हुन्।”
तर किन ती अधिकारीलाई हटाइयो भन्ने स्पष्ट छैन। उनी ३७ जना हालका वा पूर्व गुप्तचर अधिकारीहरूको सूचीमा परेकी थिइन्, जसको सुरक्षा अनुमति गब्बार्डले सार्वजनिक रूपमा नै खारेज गरेकी थिइन्।
गब्बार्डले उनीहरूमाथि “गुप्तचर कार्यलाई राजनीतिकरण गरेर जनविश्वास दुरुपयोग गरेको, संवेदनशील जानकारी चुहाएको र नियम उल्लंघन गरेको” आरोप लगाएकी छिन्।
यो घटनालाई गब्बार्डको नेतृत्वमा रहेको एजेन्सी डीएनआई र सीआईएबीच बढ्दो प्रशासनिक तनावको पछिल्लो उदाहरणको रूपमा हेरिएको छ।