प्रकाशित मिति : चैत्र २८, २०८१ बिहीबार
अमेरिकी ऊर्जा विभागका कर्मचारीले ट्रम्प प्रशासनले गरेको दोस्रो राजीनामा प्रस्तावलाई स्वीकार गरेका छन ।
२ हजार ६०० भन्दा बढी अमेरिकी ऊर्जा विभागका कर्मचारीहरूले ट्रम्प प्रशासनद्वारा दिइएको दोस्रो चरणको राजीनामा प्रस्ताव स्वीकार गरेको बताइएको छ ।
अमेरिकाको विद्युत् ग्रिड स्थिरता र उच्च प्रविधिको ऊर्जा परियोजनाका लागि ऋण दिने कार्यालयहरूमा यो प्रकरणले गम्भीर असर पार्ने देखिएको छ।
१ हजार २१७ जना कर्मचारीले जनवरीमा पहिलो चरणको राजीनामाको प्रस्ताव स्वीकार गरेका थिए ।
स्रोतका अनुसार ४० वर्षभन्दा बढी उमेर भएका कर्मचारीलाई प्रस्ताव स्वीकार गर्न थप ४५ दिन दिइएको छ । यस कारण यो संख्या आगामी हप्ताहरूमा अझै बढ्न सक्ने अपेक्षा गरिएको छ ।
जनवरीमा राष्ट्रपति डोनाल्ड ट्रम्प र उनका सहयोगी अरबपति एलन मस्कको नेतृत्वमा संघीय सरकारको आकार घटाउने योजनाअन्तर्गत २० लाख संघीय कर्मचारीलाई वित्तीय प्रस्ताव गरिएको थियो । जसमा उर्जा विभागका कर्मचारीहरू पनि समावेश थिए ।
ऊर्जा विभागमा करिब १७ हजार कर्मचारी कार्यरत छन् । दोस्रो चरणको राजीनामा प्रस्ताव स्वीकार गरिएपछि विभागले थप कर्मचारीहरूलाई पनि बिदा गर्न सकिने संकेत दिएको छ ।
ऊर्जा मन्त्री क्रिस राइटले यसै हप्ता विभागका सबै कर्मचारीलाई पठाएको इमेलमा राष्ट्रपति ट्रम्पद्वारा परिकल्पना गरिएको रणनीतिक प्राथमिकताहरूसँग मेल खाने गरी विभागमा व्यापक रूपमा कटौतीको प्रक्रिया हुने सम्भावना बढ्ने उल्लेख गरिएको छ ।
उनले केही सुरक्षा, राष्ट्रिय सुरक्षा, कानून कार्यान्वयन तथा अन्य आवश्यक सेवामा कार्यरत कर्मचारीहरूले राजीनामा प्रस्ताव लिन नपाउने बताएका छन ।
ऊर्जा विभागका प्रवक्ताले राजीनामा प्रस्ताव स्वीकार गर्ने अन्तिम समयसीमा शुक्रबार मध्यरातसम्म लम्बाइएकोले अहिले नै संख्या पुष्टि गर्न नसकिने बताए ।