प्रकाशित मिति : २२ जेष्ठ २०८३, शुक्रबार
Photo: Heidi Kaden/Unsplash
अमेरिकी राष्ट्रपति डोनाल्ड ट्रम्पले अमेरिकाको २५० औँ स्थापना दिवसका लागि तय गरिएको कन्सर्ट शृङ्खलाका कलाकारहरूलाई घरमै बस्न निर्देशन दिएका छन्। कार्यक्रममा सहभागी हुने भनिएका कलाकारहरूले नाम फिर्ता लिएपछि राष्ट्रपति ट्रम्पले कन्सर्टको सट्टा “र्यालीहरूको पनि महा-र्याली”आयोजना गर्ने घोषणा गरेका हुन्।
अमेरिकाको २५० औँ जन्मदिन ऐतिहासिक बनाउन विशाल र्याली, अभूतपूर्व आतिशबाजी र ह्वाइट हाउसको प्राङ्गणमा अल्टिमेट फाइटिङ च्याम्पियनसिपको प्रतिस्पर्धा जस्ता विविध कार्यक्रमहरू तय गरिएका छन्। तर, ट्रम्प समर्थक संस्थाद्वारा वित्तीय सहयोग प्राप्त केही कार्यक्रमहरूका कारण यो राष्ट्रिय उत्सव राजनीतिकरण हुन सक्ने भन्दै प्रश्नहरू उठ्न थालेका छन्।
यो ऐतिहासिक उत्सवको खाका तयार पार्न अमेरिकी कांग्रेसले १० वर्षअघि ‘अमेरिका२५०’नामक गैर-दलीय संस्था स्थापना गरेको थियो। अर्कोतर्फ, ‘फ्रीडम २५०’ राष्ट्रपति ट्रम्पद्वारा स्थापित एक सार्वजनिक-निजी साझेदारी संस्था हो। यस ऐतिहासिक उत्सवका लागि कांग्रेसले १५ करोड अमेरिकी डलर संघीय कोष विनियोजन गरेको छ भने ‘फ्रीडम २५०’ ले थप लाखौँ डलर खर्च गर्दैछ।
उत्सवको मुख्य आकर्षण १६ दिने ‘स्टेट फेयर’ (राज्य मेला) हुनेछ, जुन जुन २५ देखि जुलाई १० सम्म युएस क्यापिटोलदेखि वासिङ्टन स्मारक सम्म सञ्चालन हुनेछ। ‘फ्रीडम २५०’ का अनुसार यस मेलामा अमेरिकाका सबै ५६ राज्य र क्षेत्रहरूको प्रदर्शनी गरिनेछ र यसको उद्घाटन राष्ट्रपति ट्रम्पले गर्नेछन्।
यस मेलाको अङ्ग रहेको ‘ग्रेट अमेरिकन स्टेट फेयर कन्सर्ट शृङ्खला’ भने विवादमा परेको छ। मार्टिना म्याकब्राइड, द कमोडोर्स, योङ एमसी र ब्रेट माइकल्स जस्ता चर्चित कलाकारहरूले ह्वाइट हाउस र फ्रीडम २५० सँगको आबद्धताप्रति असन्तुष्टि जनाउँदै नाम फिर्ता लिएका छन्। कलाकारहरूले विना जानकारी कार्यक्रमलाई राजनीतिकरण गरिएको आरोप लगाएका छन्।
यसको जवाफमा ट्रम्पले ती सङ्गीतकारहरूलाई हटाउँदै सामाजिक सञ्जाल ‘ट्रुथ सोसल’ मा लेखेका छन्, “हामीलाई ठुलो शुल्क लिने तर प्रतिभा नभएका गायकहरू चाहिँदैन। हामीले उनीहरूलाई घरमै बस्न भनिसकेका छौँ। हामीलाई मात्र तपाईं, म, केही वक्ता र वर्षौँदेखि सुन्दै आएको उत्कृष्ट सङ्गीत भए पुग्छ।”
राष्ट्रपति ट्रम्पको ८० औँ जन्मदिन जुन १४को अवसर पारेर ह्वाइट हाउसको ‘साउथ लन’ मा ५,००० दर्शक क्षमताको युएफसी फाइट केज निर्माण भइरहेको छ। ह्वाइट हाउस वरपर रहने अन्य १ लाख खेलप्रेमीका लागि ठुला स्क्रिनहरूको व्यवस्था गरिनेछ। ‘फ्रीडम २५०’ ले व्यवस्थापन गरे पनि यस खेलको सम्पूर्ण खर्च युएफसीले ब्यहोर्ने छ र यो सर्वसाधारणका लागि नि:शुल्क हुनेछ।
जुलाई ४ को स्वतन्त्रता दिवसका अवसरमा वासिङ्टनमा ४० मिनेट लामो भव्य आतिशबाजी प्रदर्शन गरिनेछ। ‘फ्रीडम २५०’ र ‘पाइरोटेक्निको’ कम्पनीले संयुक्त रूपमा आयोजना गर्ने यस शोमा ८ लाख ६० हजारभन्दा बढी पटाका पड्काइनेछ। यसले सन् २०१६ मा फिलिपिन्सले बनाएको विश्वको सबैभन्दा ठुलो आतिशबाजीको कीर्तिमान तोड्ने लक्ष्य राखेको छ।
राजधानी बाहिर पनि विभिन्न उत्सवहरू आयोजना गरिँदैछन्। जुलाई ४ का दिन न्यूयोर्कको टाइम्स स्क्वायरमा अमेरिकाका आठवटै टाइम जोन अनुसार आठ पटक बल ड्रप गरिनेछ। फिलाडेल्फियामा एउटा विशेष टाइम क्याप्सुल गाडिनेछ, जुन पाँच सय वर्षपछि अर्थात् सन् २२७६ मा मात्र खोलिनेछ। त्यस्तै, लस एन्जलसमा ५० हजार दर्शक क्षमताको कन्सर्ट र मिलवाकी जस्ता सहरहरूमा ब्लक पार्टी को आयोजना गरिनेछ।
स्थापना दिवसको पूर्वसन्ध्यामा वासिङ्टन डीसीलाई सुन्दर बनाउने प्रयासस्वरूप ट्रम्पले धेरै सौन्दर्यीकरण योजनाहरू अघि सारेका छन्। यसै अन्तर्गत, लिंकन मेमोरियल र वासिङ्टन स्मारकको बीचमा रहेको २,०३० फिट लामो ऐतिहासिक रिफ्लेक्टिङ पुललाई नीलो रङ लगाउन सुरु गरिएको छ।
राष्ट्रपति ट्रम्पले यो रङरोगनले पोखरी चुहिने समस्या ४० देखि ५० वर्षका लागि समाधान गर्ने दाबी गरेका छन्। तर, एउटा गैर-नाफामूलक संस्थाले ऐतिहासिक धरोहरको स्वरूप बिगारेको भन्दै यसविरुद्ध अदालतमा कानुनी चुनौती दिएको छ। कानुनी विवादका बीच ट्रम्पले जुन ३ मा पोखरीको अन्तिम कोटको काम सकिएको र चाँडै पानी भर्न सुरु गरिने स्पष्ट पारेका छन्।