प्रकाशित मिति : २३ असार २०८३, मंगलबार
फोटो: होमल्याण्ड सेक्युरिटी
आप्रवासीहरू विरुद्ध अमेरिकी सरकारको देशव्यापी धरपकड तीव्र भइरहेका बेला ह्युस्टनमा मंगलबार आइसका एजेन्टले एक चालकको गोली हानी हत्या गरेका छन्। एजेन्सीले जारी गरेको विज्ञप्ति अनुसार, अधिकारीहरूले सवारी साधन रोक्न खोज्दा उक्त घटना भएको हो।
गोली लागेर मृत्यु हुने व्यक्तिको पहिचान लोरेन्जो साल्गाडो अराउजोको रूपमा भएको छ। आइसले उनलाई मेक्सिकन नागरिक र कागजातबिहीन आप्रवासी भनेर उल्लेख गरेको छ। एजेन्सीका अनुसार संघीय अध्यागमन अधिकारीहरूको लक्षित कारबाहीका क्रममा उनले गिरफ्तारीबाट उम्किन खोजेका थिए।
यद्यपि, मृतकका छोरा रोनाल्डो साल्गाडोले स्पेनिस भाषाको टेलिभिजन च्यानल ‘तेलेमुन्डो ह्युस्टन’ सँग कुरा गर्दै आफ्ना पिता त्यस क्षेत्रमा कामदार खोज्न निस्किएका बेला गोली हानिएको दाबी गरेका छन्।
आइसले भने साल्गाडोले आफ्नो गाडीले आइसको गुडिरहेको सवारी साधनलाई ठक्कर दिएको, पटक-पटकको मौखिक आदेश अटेर गरेको र अधिकारीहरूलाई गाडीले किच्न खोजेको आरोप लगाएको छ। विज्ञप्तिमा भनिएको छ, हाम्रा अधिकारीले आत्मरक्षाका लागि गोली चलाउनुपरेको थियो। गोली लागेर गम्भीर घाइते भएका साल्गाडोलाई अस्पताल पुर्याइएलगत्तै चिकित्सकले मृत घोषित गरेका थिए।
अन्तर्राष्ट्रिय समाचार एजेन्सी रोयटर्सले ती व्यक्तिको कानुनी हैसियत र घटनाको वास्तविक परिस्थितिको स्वतन्त्र पुष्टि गर्न नसकेको जनाएको छ। तर, घटनास्थल नजिकैको एउटा व्यापारिक संस्थाको सीसीटीभी फुटेजमा एक व्यक्ति सेतो भ्यानको छेउमा भुइँमा लडिरहेको र सुरक्षाकर्मीहरूले उनलाई घेरेको देखिन्छ।
पछिल्लो एक वर्षमा अमेरिकी अध्यागमन निकायहरूले बल प्रयोगका घटनामा दिएका सुरुवाती बयानहरू भिडियो फुटेज र अन्य प्रमाणका कारण अदालतमा झूटो साबित भएका उदाहरणहरू छन्। यसै पृष्ठभूमिमा अमेरिकी प्रतिनिधि सिल्भिया गार्सीया र लेटिन अमेरिकी नागरिकहरूको लिगका अध्यक्ष रोमन पालोमारेसले घटनाको पूर्ण, पारदर्शी र निष्पक्ष अनुसन्धान हुनुपर्ने माग गरेका छन्।