प्रकाशित मिति : मंसिर १८, २०८१ मंगलबार
गत जुलाईदेखि बेपत्ता भर्जिनियाको मानसास पार्ककी नेपाली नर्स ममता काफ्ले भट्टका पति नरेश भट्टविरुद्ध पहिलो डिग्री हत्याको अभियोग लगाइएको छ । प्रिन्स विलियम काउन्टीको ग्रान्ड जूरीले सोमबार नरेश भट्टलाई अपराधिक हत्या र शवलाई शारीरिक रूपमा छेडखानी गरेको अभियोग लगाइएको अदालतका कागजातहरूमा उल्लेख गरिएको छ । यसअगाडि नरेश भट्टविरुद्ध शव लुकाएको अभियोगमात्र लगाइएको थियो ।
भर्जिनियामा फर्स्ट डिग्री हत्यामा दोषी ठहर भएमा गम्भीर आपराधिक दण्डको सामना गर्नुपर्छ । फर्स्ट डिग्री हत्या भर्जिनियाको कमनवेल्थमा दोश्रो श्रेणीको सबैभन्दा ठूलो अपराध हो। जसमा दोषी ठहर भएमा आजीवन जेल सजाय र १ लाख डलरसम्म जरिवाना हुनसक्छ ।
३७ वर्षीय नरेश भट्टलाई प्रिन्स विलियम काउन्टी जेलमा अगस्त २२ देखि विना धरौटी राखिएको छ । नरेश भट्टले आफ्नो मुद्दाको सुनुवाई जतिसक्दो चाँडो सकाउने प्रयास गरिरहेका छन् । शव लुकाएको अपराधको आरोपमा उनको जुरी सुनुवाई प्रिन्स विलियम सर्किट अदालतमा डिसेम्बर ९ को लागि तय गरिएको छ। सोमबार थप अभियोग लगाइएपछि डिसेम्बर ९ को सुनुवाई हुने नहुने निश्चित भएको छैन ।
प्रहरीले ममता काफ्ले भट्टको शव वा हत्या गरेको हतियार अझै फेला पार्न सकेको छैन । तर अदालतको कागजात अनुसार नरेश भट्टले ममताको हत्या गरी शव लुकाएको विश्वास गरिएको छ । जघन्य हत्याको लागि प्रत्यक्ष अभियोगमा नरेश भट्टलाई जुलाई २९ र अगस्ट २ बीच ममता काफ्ले भट्टको हत्या जानीजानी र योजनावद्ध तरिकाले गरेको आरोप लगाइएको छ।
अघिल्लो अदालतको सुनुवाइको क्रममा अभियोजकहरूले सेलफोन डाटा, भिडियो क्यामेरा, उनको टेस्लाबाट निकालिएको जीपीएस डाटा र लाइसेन्स प्लेट रिडरहरूबाट सङ्कलन गरिएका प्रमाणहरू प्रस्तुत गरे का थिए । जसमा नरेश भट्टले ठूला रद्दीका टोकरीका झोलाहरूमा भएका वस्तुहरू फ्याक्न फोहोर फ्याक्ने स्थानमा यात्रा गरेका थिए।