नेपालबाट दक्षिण कोरियाको भिसा आवेदन अब “आवेदन केन्द्र”बाट मात्रै

नेपालस्थित दक्षिण कोरियाको दुतावासले दुतावासबाट हुँदै आएको भिसा सम्बन्धी कार्य स्थगित गरेको छ । यसपछि कुटनीतिक र सरकारी भिसा आवेदनबाहेक अन्य सबै आवेदनहरु भिसा आवेदन केद्रबाट हुने गरी व्यवस्थापन गरिएको नेपालस्थित दक्षिण कोरियाको दुतावासले जनाएको छ ।

यसअघि जुनसुकै प्रकारको भिसा आवेदनहरु दुतावास आफैले लिने गरेको थियो । तर, केही वर्षअघि देखि आवेदकले अपोइन्टमेन्ट स्ल्टहरु नपाउने र कतिपय अवस्थामा अपोइन्टमेन्टका लागि बाहिरी मानिसहरुलाई मोटो रकम बुझाएर लिन पर्ने अवस्था बनिरहेको थियो । दलाल मार्फत् अपोइन्टमेन्ट लिन नेपाली नागरिकहरुले ४५ हजार रुपैयाँसम्म बुझाउँदै आइरहेका थिए ।

भिसा आवेदनका लागि यही डिसेम्बर १७ देखि कोरिया भिसा आवेदन केन्द्र पुल्चोक ललितपुरमा सम्पर्क राख्न सकिने गरी व्यवस्थापन गरिएको दुतावासले जानकारी दिएको छ ।

नेपालमा रहेका धेरै दुतावासहरुले भिसा आवेदन केन्द्रमार्फत् विभिन्न भिसाहरुको प्रशोधन गरिरहेका छन् । दुतावास नै रहेको जापानले पनि केही वर्षअघिदेखि भीएफएस मार्फत् भिसा आवेदन लिँदै आएको छ । भीएफएसलाई यो जिम्मेवारी दिनुपूर्व जापान दुतावासले नै भिसा आवेदन लिने र ३ दिनभित्र पासपोर्ट फिर्ता गर्दै आएको थियो ।

युरोपका सबै देशहरुले भिसा आवेदन केन्द्रमार्फत् भिसा सम्बन्धी कामहरु गरिरहेका छन् भने स्वीजरल्याण्ड दुतावासले पनि केही महिना अघिदेखि भीएफएसलाई भिसा सम्बन्धी आवेदन लिने जिम्मेवारी दिएको छ । जर्मन दुतावासले भने अहिलेसम्म दुतावासबाटै भिसा आवेदन स्वीकार गरिरहेको छ ।

अमेरिकी दुतावासले पनि काठमाडौंस्थित दुतावासबाटै भिसा सम्बन्धी सम्पूर्ण कार्य गर्दै आएको छ । केही समयअघिसम्म थाइ दुतावासले पनि दुतावासमै आवेदन लिने र भिसा सम्बन्धी निर्णय गर्दै आएकोमा उसले पनि भिसा आवेदन केन्द्रबाट मात्रै आवेदनहरु लिन थालेको छ । नेपालीहरुको आकर्षक गन्तव्य रहेको अष्ट्रेलिया, क्यानाडा, संयुक्त अधिराज्य (युके), चिनलगायतका देशहरुले पनि भिसा आवेदन केन्द्रमार्फत् मात्रै भिसा सम्बन्धी आवेदन लिँदै आएका छन् ।