गैर कानुनी रूपमा अमेरिका प्रवेश गर्ने आप्रवासीलाई ५ हजार डलरको ‘अप्रिहेन्सन शुल्क’ लगाउने तयारी 

अमेरिकी राष्ट्रपति डोनाल्ड ट्रम्प प्रशासनले गैर कानुनी रूपमा प्रवेश गर्ने आप्रवासीहरूलाई ५ हजार डलरको ‘अप्रिहेन्सन शुल्क’ लगाउने तयारी गरेको छ । यूएस बोर्‍डर पेट्रोल प्रमुख माइकल बैंकसका अनुसार यो शुल्क १४ वर्ष वा सोभन्दा माथिका ती व्यक्तिहरूलाई लागू हुनेछ, जो प्रवेश नाकाबाहेक अन्य स्थानबाट सीमा पार गरी पक्राउ पर्छन्।

यो शुल्क रिपब्लिकनहरूले पारित गरेको वन बिग ब्यूटिफुल बिल एक्टअन्तर्गत लागू हुनेछ, जसले आप्रवासनसँग सम्बन्धित विविध शुल्कमा वृद्धि र नयाँ दण्ड थपेको छ।

नयाँ कानुनले आश्रय निवेदनका लागि १०० डलर अनिवार्य शुल्क, हरेक वर्ष थप १०० डलर तथा विशेष आप्रवासी किशोर स्थितिको लागि न्यूनतम २५० डलर शुल्क पनि अनिवार्य गरेको छ। यसले खासगरी नाबालक र आर्थिक रूपमा कमजोर आप्रवासीहरूलाई ठूलो असर पर्ने जानकारहरु बताउँछन् ।

यही कारण डेमोक्र्याट सांसदहरूले एक्टका केही प्रावधान उल्ट्याउने गरी नयाँ विधेयक “Upholding Protections for Unaccompanied Children Act” पेश गरेका छन्। यसले नाबालकलाई ५,००० डलर सीमा–पक्राउ शुल्क, आश्रय शुल्क र अदालतसम्बन्धी अन्य शुल्कबाट छुट दिने प्रावधान राखेको छ।

मानवअधिकार समूह काइन्डका अध्यक्ष वेन्डी यङका अनुसार नयाँ शुल्कहरूले “खतरा, तस्करी र शोषण भोगेका बालबालिकाका सुरक्षा मार्गहरू बन्द गरिदिने खतरा” बढाएको छ।

यसैबीच, ट्रम्प प्रशासनको कडा नीतिका कारण दक्षिणी सीमामा गैरकानुनी प्रवेशमा उल्लेखनीय गिरावट आएको छ। अमेरिकी डिपार्टमेन्ट अफ होमल्याण्ड सेक्युरिटीका अनुसार अक्टोबरदेखि नोभेम्बर सम्ममा मात्र ६०,९४० सीमा–भेटघाट दर्ज भएका छन्, जुन अमेरिकी इतिहासमा कुनै पनि आर्थिक वर्षको सुरुवातमा सबैभन्दा कम हो।