प्रकाशित मिति : भाद्र १८, २०८२ बिहीबार
अमेरिकामा एसाइलमका मुद्दा छिटो टुंग्याउन रक्षा मन्त्रालयले ६०० सम्म सैन्य वकिलहरूलाई अस्थायी आप्रवासन न्यायाधीशको रूपमा काम गर्न अधिकार दिनेबारे विचार गरिरहेको रक्षा अधिकारीले पुष्टि गरेका छन्। पेन्टागनका प्रमुख प्रवक्ता सिन पार्नेलले एक विज्ञप्तिमा डिपार्टमेन्ट अफ जस्टिसको अनुरोधमा रक्षा मन्त्रालयले अस्थायी आप्रवासन न्यायाधीशको रूपमा सेवा गर्न योग्यहरूको पहिचान गर्ने प्रक्रिया सुरु गरेको बताएका छन् ।
यसअघि ट्रम्प प्रशासनले यस वर्ष मात्रै देशभरि दुई दर्जनभन्दा बढी आप्रवासन न्यायाधीशलाई बर्खास्त गरेको थियो। संघीय जिल्ला अदालतका न्यायाधीशहरूभन्दा फरक आप्रवासन न्यायाधीशहरू डिपार्टमेन्ट अफ जस्टिसअन्तर्गत काम गर्छन्। अहिले आप्रवासन अदालतहरूमा ३४ लाखभन्दा बढी मुद्दाहरूको सुनुवाइ हुन बाँकी रहेको छ। अध्यागमन अदालतमा नेपालीका ९ हजार ६ सय २८ मुद्दाहरु विचाराधिन रहेका छन् । जसमध्ये न्युयोर्कमामात्र नेपालीका ३५४४ मुद्दाहरु विचाराधिन रहेका छन् ।
त्यसपछि सान फ्रान्सिस्को, क्यालिफोर्नियामा १,७५२ र सान एन्टोनियो, टेक्ससमा १,३६५ मुद्दाहरू विचाराधीन छन्। अन्य स्थानहरूमा कन्कोर्डमा ३२०, डेनभरमा २७०, ड्यालसमा २२८, बाल्टिमोरमा १६७, र बोस्टनमा ९२ नेपालीका मुद्दाहरू विचाराधीन रहेका छन्।
सामान्यतया न्यायाधीश अधिवक्ता जनरल कोरका अधिकारीहरूले सैनिक र उनीहरूका परिवारलाई कानुनी सहयोग प्रदान गर्ने वा युद्धको कानुनी पक्षबारे कमान्डरहरूलाई सल्लाह दिने काम गर्छन्। यी रक्षा वकिलहरूलाई अध्यागमन अदालतमा ल्याएको खण्डमा आप्रवासन कानुन, प्रक्रिया र नीतिबारे केही तालिमको आवश्यकता पर्नेछ।
गत महिना ट्रम्प प्रशासनले अस्थायी आप्रवासन न्यायाधीशहरूको लागि योग्यताका मापदण्डलाई खुकुलो पारेको थियो, जसले सरकारी वकिलहरूको ठूलो समूहलाई आप्रवासन अदालतमा मुद्दाहरू हेर्न अनुमति दिएको छ। अगस्टको अन्त्यमा प्रकाशित यसको नयाँ नियमले डिपार्टमेन्ट अफ जस्टिसलाई अस्थायी आप्रवासन न्यायाधीशहरूका लागि आप्रवासन कानुनको अनुभव हुनैपर्ने भन्ने प्रतिबन्धले कार्यकारी कार्यालयको हितको सेवा नगर्ने विश्वास भएको उल्लेख गरेको छ। यसअघि १० वर्षको अनुभव भएका डिपार्टमेन्ट अफ जस्टिसका वकिलहरू वा पूर्व आप्रवासन न्यायाधीशहरूले मात्र यी पदहरू भर्न पाउँथे।
डिपार्टमेन्ट अफ डिफेन्सका वकिलहरू सैन्य मामिलाहरूका लागि उपयुक्त भए पनि आप्रवासन कानुन पूर्ण रूपमा फरक र असाध्यै जटिल भएकाले यो मुटु रोग विशेषज्ञलाई हिपको शल्यक्रिया गर्न लगाउनु जस्तै भएको भन्दै अमेरिकन इमिग्रेसन लयर्स एसोसिएसनले आलोचना गरेको छ । कानुनसँग अपरिचित न्यायाधीशहरूबाट निष्पक्ष निर्णयको आशा गर्नु बेतुक हुने भन्दै आलोचना गरिएको छ ।