प्रकाशित मिति : भाद्र ९, २०८२ मंगलबार
रूसी सेना डिनिप्रोपेत्रोभ्स्क क्षेत्रमा प्रवेश गरेको युक्रेनी सेनाले स्वीकार गरेको छ। युक्रेनी सेनाले बताएअनुसार रूसको सेना पूर्वी औद्योगिक क्षेत्र डिनिप्रोपेत्रोभ्स्कमा प्रवेश गरेको छ र आफ्नो पकड जमाउने प्रयास गरिरहेको छ।
डिनिप्रो अपरेशनल स्ट्राटेजिक ग्रुप अफ ट्रुप्सका भिक्टर ट्रेहुबोभले भने, “डिनिप्रोपेत्रोभ्स्क क्षेत्रमा यति ठूलो स्तरको आक्रमण पहिलो पटक भएको हो।” उनले रूसी सेनाको अग्रगमनलाई रोकिने पनि बताए।
गएको गर्मीभरि रूसले आफू उक्त क्षेत्रमा प्रवेश गरेको दाबी गर्दै आएको छ, जसमा डोनेट्स्क क्षेत्र हुँदै युक्रेनी भूभागमा अझ गहिरो प्रवेश गर्ने प्रयास भइरहेको छ।
जुनको सुरुवातमै रूसी अधिकारीहरूले डिनिप्रोपेत्रोभ्स्कमा आक्रमण सुरु भएको बताएका थिए। तर युक्रेनी पक्षका पछिल्ला रिपोर्टहरूअनुसार उनीहरूले क्षेत्रको सीमा मात्रै कठिनाइका साथ पार गर्न सकेका छन्।
डिनिप्रोपेत्रोभ्स्कमा रूसी सेनाको अग्रगमन युक्रेनी मनोबलका लागि ठूलो धक्का हुनेछ । विशेषगरी अमेरिकाको नेतृत्वमा भइरहेको युद्ध अन्त्य गर्ने कूटनीतिक प्रयास कमजोर हुँदै गएको अवस्थामा ठूलो धक्का हुनेछ ।
युक्रेनी “डीपस्टेट” नक्सा परियोजनाले रूसले सो क्षेत्रभित्रका दुई गाउँ जापोरिज्के र नोभोहरीहोरिभ्का कब्जा गरिसकेको बताएको छ। तर युक्रेनी सेनाको जनरल स्टाफले यसलाई अस्वीकार गर्दै विज्ञप्तिमा भनेको छ, “जापोरिज्के अझै हाम्रो नियन्त्रणमा छ” र “नोभोहरीहोरिभ्काको क्षेत्रमा सक्रिय लडाइँ चलिरहेको छ।”
मास्कोले डिनिप्रोपेत्रोभ्स्कमाथि औपचारिक दाबी नगरे पनि यसका ठूला शहरहरू—क्षेत्रीय राजधानी डिनिप्रो समेत—माथि आक्रमण गरेको छ। युद्धअघि डिनिप्रोपेत्रोभ्स्कमा तीन मिलियनभन्दा बढी जनसंख्या थियो। यो डोनबासपछि युक्रेनको दोस्रो ठूलो भारी उद्योग केन्द्र मानिन्थ्यो।
रूसी सेनाले ठूलो क्षति बेहोरे पनि डोनेट्स्क क्षेत्रमा पछिल्ला दिनहरूमा केही प्रगति गरेको छ। यसै महिना डोब्रोपिलियामा साना रूसी पैदल समूहले अचानक १० किलोमिटर युक्रेनी रक्षा रेखा पार गरेका थिए। तर पछिल्ला संकेतअनुसार उनीहरूको अग्रगमन रोकिएको छ।
पुटिनले युक्रेनले अझै नियन्त्रण गरिरहेका डोनेट्स्कका क्षेत्रहरू सुम्पिए ट्रम्पसँग युद्ध अन्त्य गर्न तयार हुने बताएका थिए। तर धेरै युक्रेनीहरूले पुटिनको योजना अझ फराकिलो रहेको विश्वास गर्छन्।
अलास्कामा पुटिन र वाशिंगटनमा राष्ट्रपति भोलोदिमिर जेलेन्स्की भेटेपछि ट्रम्पले दुवै नेताबीचको शिखर सम्मेलनको तयारी सुरु भएको बताएका थिए।
तर गत हप्ताको अन्त्यतिर सम्झौताबारेको आशा कमजोर हुँदै गयो। अमेरिकी राष्ट्रपति ट्रम्प दुईबीचको युद्ध रोक्नका लागि प्रयासरत रहेको ह्वाइट हाउसले बताइरहे पनि युद्धमा कमी आएको छैन। बरु रूसी राष्ट्रपति पुटिनले ट्रम्पसँग वार्ता गर्ने र युक्रेनमा हमला पनि बढाइरहने रणनीति अख्तियार गरेको देखिन्छ।