प्रकाशित मिति : भाद्र २, २०८२ मंगलबार
नेब्रास्कामा मानव बेचबिखनको ठूलो सञ्जाल चलाएको आरोपमा पाँच जना भारतीय नागरिकलाई पक्राउ गरिएको छ। उनीहरूलाई अमेरिकाको अध्यागमन तथा भन्सार प्रवर्तन आइसको एक विशेष अभियानका क्रममा पक्राउ गरिएको हो। यस अभियानले २७ जना पीडितहरूलाई उद्धार गरेको थियो, जसमा १० जना बालबालिका पनि छन्।
डिपार्टमेन्ट अफ होमल्याण्ड सेक्युरिटीले जारी गरेको प्रेस विज्ञप्ति अनुसार अगस्ट १२ मा गरिएको यो कारबाहीले हिंस्रक, आपराधिक र कागजातविहीन विदेशीहरूद्वारा संचालित एक विशाल मानव बेचबिखन सञ्जालको भण्डाफोर गरेको छ। यो गिरोहले ओमाहा र मध्य नेब्रास्काका मोटेल र आइब्रो सैलुनहरूबाट आफ्नो सञ्चालन गर्ने गरेको बताइएको छ।
पक्राउ पर्ने पाँच जना भारतीय नागरिकहरूमा केन्टाकुमार चौधरी उर्फ केन चौधरी, रश्मी अजित सामनी उर्फ फाल्गुनी सामनी, अमित प्रहलादभाई चौधरी उर्फ अमित, अमित बाबुभाई चौधरी उर्फ म्याट र महेशकुमार चौधरी उर्फ महेश रहेका छन्।
उनीहरूमाथि श्रम बेचबिखन, यौन बेचबिखन र अवैध आप्रवासीहरूलाई आश्रय दिएको जस्ता संघीय आरोपहरू लगाइएको छ। आइसले उनीहरूलाई संघीय आपराधिक मुद्दाहरू सकिएपछि पनि रिहा हुन नपाऊन् भनेर अध्यागमन हिरासतमा राख्ने आदेश जारी गरेको छ।
अधिकारीहरूका अनुसार पीडितहरूको अवस्था भयानक थियो। उद्धार गरिएका व्यक्तिहरूलाई सांग्लाले भरिएका र आधारभूत सरसफाइ र सुरक्षाविहीन कोठाहरूमा कोचिएर राखिएको थियो। बालबालिका र वयस्क दुवैलाई यौन बेचबिखन गरिएको थियो भने ती स्थानहरूमा लागूपदार्थको कारोबार पनि हुने गरेको आरोप छ।
होमल्याण्ड सेक्युरिटी अधिकारी ट्रिसिया म्याक्लाघलिनले यौन शोषण र बेचबिखनको सिकार भएका यी बालबालिका र महिलाहरूलाई उद्धार गरिएको बताउदै बालबालिका र महिलालाई यस्ता जघन्य मानव बेचबिखन गिरोहको सिकार हुन नदिने बताएकी छिन् ।
पाँच भारतीय नागरिकबाहेक आइसले सोही अपरेशनका क्रममा अन्य १४ जना कागजात नभएका आप्रवासीलाई पनि नियन्त्रणमा लिएको छ। अधिकारीहरूले ५ लाख ६५ हजार डलरभन्दा बढी नगद र अवैध लागूपदार्थ पनि बरामद गरेका छन् भने यस मामिलामा संलग्न मोटेलहरूको बिक्री रोक्न कदम चालेका छन्।