प्रकाशित मिति : श्रावण ३, २०८२ शनिबार
अमेरिकी राष्ट्रपति डोनाल्ड ट्रम्पले अन्तर्राष्ट्रिय आपराधिक अदालत (आईसीसी)सँग काम गर्ने व्यक्तिहरूलाई लक्षित गरी जारी गरेको कार्यकारी आदेशलाई एक संघीय अदालतले असंवैधानिक ठहर गर्दै रोक लगाएको छ।
शुक्रबार आएको निर्णयमा अमेरिकी न्यायाधीश न्यान्सी टोरेसनले ट्रम्पको आदेश अभिव्यक्ति स्वतन्त्रताको उल्लंघन भएको भन्दै कार्यान्वयनमा अस्थायी रोक लगाएकी हुन्। उनका अनुसार, “उक्त कार्यकारी आदेशले आवश्यकभन्दा धेरै अभिव्यक्ति नियन्त्रण गर्दछ र यसले संविधानमा सुनिश्चित गरिएका अधिकारहरूको उल्लंघन गर्दछ।”
यो फैसला मानव अधिकारकर्मी दुई जनाले चालाएको मुद्दासँग सम्बन्धित हो। उनीहरूले अप्रिलमा ट्रम्पको फेब्रुअरी ६ मा जारी आदेशविरुद्ध मुद्दा हालेका थिए। उक्त आदेशले आईसीसीद्वारा अमेरिकाका नागरिक वा उसका सहयोगीहरू (जस्तैः इजरायल) विरुद्ध हुने अनुसन्धानमा संलग्न व्यक्तिहरूलाई लक्षित गर्दै आर्थिक र यात्रा प्रतिबन्ध लगाउने व्यवस्था गरेको थियो।
कार्यकारी आदेश अन्तर्गत आईसीसीका प्रमुख अभियोजक करिम खानमाथि प्रतिबन्ध लगाइएको छ। बेलायती नागरिक खानलाई अमेरिकी कोष विभाग अन्तर्गतको विदेशी सम्पत्ति नियन्त्रण कार्यालय (ओएफएसी)ले प्रतिबन्धित व्यक्ति तथा संस्थाको सूचीमा राखेको छ।
यस आदेश अनुसार, प्रतिबन्धित व्यक्तिहरूको हितमा सेवा प्रदान गर्ने अमेरिकी नागरिकहरूलाई पनि नागरिक वा आपराधिक सजाय हुन सक्नेछ। यो आदेशलाई आईसीसी तथा विश्वका दर्जनौं देशहरूले कडा शब्दमा आलोचना गरेका छन्।
ह्वाइट हाउस र आईसीसी दुवैले यस निर्णयप्रति कुनै प्रतिक्रिया दिएका छैनन्।