प्रकाशित मिति : असार २४, २०८२ मंगलबार
अमेरिकामा दादुरा संक्रमण ३३ वर्ष यताकै उच्च विन्दुमा पुगेको छ । जोन्स हप्किन्स विश्वविद्यालयद्वारा सार्वजनिक गरिएको तथ्याङ्कअनुसार देशभरि हालसम्म १ हजार २७७ जनामा संक्रमण पुष्टि भइसकेको छ।
यो अत्यधिक सर्ने रोग हो । तर खोपबाट सजिलै रोकथाम गर्न सकिने रोगलाई सन् २००० तिर अमेरिकाबाट समाप्त भएको मानिएको थियो । तर हालको प्रकोपले नयाँ चिन्ता भने पैदा गराएको छ ।
यो वर्ष अमेरिकाका ३८ वटा राज्य र डिस्ट्रिक्ट अफ कोलम्बियामा दादुरा संक्रमण देखिएको छ । अहिलेसम्म कम्तीमा ३ जनाको मृत्यु भएको छ । १५५ जना अस्पतालमा भर्ना भएका छन्।
रोग नियन्त्रण केन्द्रका अनुसार कुल संक्रमितमध्ये ९२ प्रतिशतले दादुराको खोप नलगाएका थिए ।
टेक्सास राज्य सबैभन्दा बढी प्रभावित छ । टेक्सासमा ७०० भन्दा बढी संक्रमित भेटिएका छन् । क्यान्सास र न्यूमेक्सिको राज्यहरूमा पनि दर्जनौं संक्रमित फेला परेका छन ।
पछिल्लो वर्षहरूमा अमेरिकासहित विश्वका विभिन्न स्थानहरूमा खोपविरोधी धारणा बढ्दै गएको देखिएको छ । अमेरिकी स्वास्थ्य मन्त्री रोबर्ट एफ केनेडी जुनियरले अघिल्लो समयमा बालबालिकाको खोपबारे गलत सूचना फैलाएका थिए ।
दादुराको महामारीलाई सामान्यजस्तै उन देखाएका थिए। तर महामारी बढेपछि उनले सामाजिक सञ्जाल एक्स मा दादुरा, एमपक्स र रुबेला विरुद्धको खोपलाई ‘दादुराको फैलावट रोक्ने सबैभन्दा प्रभावकारी उपाय’ भन्दै समर्थन गरेका छन्।
सीडीसीका अनुसार सन् १९९० मा अमेरिकामा लगभग २८ हजार दादुराका केसहरू रिपोर्ट भएका थिए । त्यसपछि खोप दर उच्च भएर र तात्कालिक प्रतिक्रिया प्रणालीले दादुरालाई नियन्त्रणमा ल्याइएको थियो।
सन् २०१४ र २०१९ मा केही केसहरू फेरी देखिए पनि २०१९ मा कुल १ हजार २७४ केस रिपोर्ट भएका थिए ।
अहिले २०२५ मा त्यो संख्या पार गर्दै हालसम्म १ हजार २७७ संक्रमण रिपोर्ट भइसकेका छन्। दादुराले न्यूमोनिया, मस्तिष्क सुन्निने र मृत्युसम्म गराउन सक्छ ।