प्रकाशित मिति : जेष्ठ ३१, २०८२ शनिबार
तस्बिर: पुनित परांजपे / एएफपी
भारतको एक बोइङ ७८७ ड्रीमलाइनर विमान दुर्घटनामा परेर २७० जनाको ज्यान गएपछि भारत सरकारले देशभरका सबै बोइङ ७८७ विमानहरूको आकस्मिक निरीक्षण सुरु गरेको छ। यो घटना दशकको सबैभन्दा भीषण हवाई दुर्घटना मानिएको छ।
एयर इन्डियाको ७८७-८ ड्रीमलाइनर विमान २४२ यात्रु तथा चालक दलसहित बेलायतको ग्याटविक विमानस्थलतर्फ उडिरहेको थियो। बिहीबार टेकअफ गरेको केही सेकेन्डमै विमानले उचाइ घटाउन थाल्यो र तलका भवनहरूमा ठोक्किँदा ठूलो विस्फोट भयो। यस दुर्घटनामा अधिकांश शव जलेका अवस्थामा भेटिएको थियो।
विमान भारतको गुजरातस्थित अहमदाबाद नजिकै रहेको बी.जे. मेडिकल कलेजको होस्टल भवनमा ठोक्किएको थियो। दुर्घटनास्थलबाट २७० शव फेला परिसकेका छन् भने अरूको खोजी कार्य जारी रहेको छ। बी.जे. मेडिकल कलेजका जुनियर डाक्टर संघका अध्यक्ष धवल गमेतीका अनुसार घटनास्थल अत्यन्त भयावह रहेको छ।
२४२ जना सवारमध्ये केवल एकजना मात्र जीवित उद्धार भएका छन्। बाँकी सबैको मृत्यु घटनास्थलमै भएको बताइएको छ।
भारतका नागरिक उड्डयन मन्त्री राम मोहन नायडुले शनिबार पत्रकार सम्मेलन गर्दै घटनालाई गम्भीर रुपमा लिँदै सम्पूर्ण बोइङ ७८७ विमानको विस्तारित निरीक्षण सुरु गरिएको जानकारी दिए।
‘भारतीय फ्लीटमा हाल ३४ वटा बोइङ ७८७ विमान छन्। तीमध्ये आठ वटा विमानको निरीक्षण भइसकेको छ, बाँकी सबैको निरीक्षण अत्यावश्यकताका साथ तुरुन्त गरिनेछ’, मन्त्री नायडुले बताए।
नागरिक उड्डयन नियामक निकायले एयर इन्डियालाई GEnx इन्जिन जडित ७८७-र९ विमानहरूमा विशेष ध्यान दिन निर्देशन दिएको छ। यसमा टेकअफ प्यारामिटरहरू, इलेक्ट्रोनिक इन्जिन कन्ट्रोल प्रणालीको परीक्षण र इन्धनसँग सम्बन्धित चेकहरू समावेश छन्।
हालसम्म विमानहरूलाई ग्राउन्ड गरिएको छैन ।
सरकारले दुर्घटनाको सम्पूर्ण सम्भावित कारणहरूबारे गहिरो अनुसन्धान सुरु गरेको छ। प्रारम्भिक रिपोर्टहरूमा इन्जिन थ्रस्ट, फ्ल्याप्स, ल्याण्डिङ गियर किन खुलेकै अवस्थामा रहेकोजस्ता प्रश्नहरू उठाइएका छन्।
एयर इन्डिया र भारत सरकार मिलेर इन्जिनको कार्यक्षमता, प्रविधिगत समस्या, र मानवीय त्रुटिको कोणबाट छानबिन गरिरहेका छन्।
टाटा समूहले २०२२ मा एयर इन्डियाको स्वामित्व लिएपछि कम्पनीको छवि पुनःनिर्माण र सेवा सुधारमा जोड दिँदै आएको थियो। तर यो दुर्घटनाले एयर इन्डियाको साखमा पुनः गम्भीर प्रश्न उठाएको छ।
टाटा समूहका अध्यक्ष एन. चन्द्रशेखरनले शुक्रबार भने, “हामी घटनाबारे पूर्ण जानकारी लिन चाहन्छौं, तर हाललाई हामीसँग पूर्ण विवरण छैन।”
सरकारले दुर्घटनाबारे विस्तृत अध्ययन गर्न एक उच्चस्तरीय छानबिन समिति गठन गरेको छ। मन्त्री नायडुले तीन महिनाभित्र छानबिन प्रतिवेदन सार्वजनिक गरिने जानकारी दिए।
“हामी सबै सम्भव सुरक्षा उपायहरूमा सुधार ल्याउनेछौं,” मन्त्री नायडुले भने। उनले पत्रकारहरूसँगको प्रत्यक्ष संवाद भने टारेका छन्।