प्रकाशित मिति : बैशाख २९, २०८२ सोमबार
इजरायली-अमेरिकी बन्धक एडन अलेक्जान्डरलाई चाँडै गाजामा रिहा गरिने भएको छ। हमासका एक वरिष्ठ अधिकारीले आइतबार यो जानकारी दिए। यो कदमलाई प्रमुख अरब मध्यस्थकर्ता कतार र इजिप्टले युद्धग्रस्त गाजामा युद्धविराम वार्ता पुनः शुरू गर्न प्रोत्साहनजनक कदमको रूपमा वर्णन गरेका छन्।
हमासका अधिकारीले २१ वर्षीय अलेक्जान्डरको रिहाइको मिति स्पष्ट नगरे पनि, यो मामिलासँग परिचित एक स्रोतले मंगलबारसम्म रिहाइ हुने सम्भावना रहेको बताए। न्यूजर्सीमा जन्मे-हुर्केका इजरायली सेनाका सैनिक अलेक्जान्डरलाई हमासले बन्धक बनाएका अन्तिम जीवित अमेरिकी नागरिक मानिन्छ।
हमासका अनुसार, अलेक्जान्डरको रिहाइ युद्धविराम सम्झौतामा पुग्ने र गाजामा मानवीय सहायता प्रवेश गर्न दिने प्रयासको हिस्सा हो। गाजामा इजरायलले मार्चमा नाकाबन्दी लगाएपछि सहायता आपूर्ति तीव्र रूपमा घट्दै गएको छ, जसले यहाँका २३ लाख जनसंख्यालाई संकटमा पारेको छ।
अमेरिकी राष्ट्रपति डोनाल्ड ट्रम्पले यो हप्ता मध्यपूर्व भ्रमण गर्दैछन्। उनका विशेष दूत एडम बोहलरले अलेक्जान्डरको रिहाइको समाचारलाई सकारात्मक कदम मानेका छन्। बोहलरले हमासलाई अन्य चार अमेरिकीहरूको शव पनि रिहा गर्न अनुरोध गरेका छन्।
ट्रम्पले आफ्नो ट्रुथ सोशल प्लेटफर्ममा लेखे, ‘यो अमेरिका र मध्यस्थकर्ता कतार र इजिप्टको प्रयासप्रति सद्भावमा लिइएको कदम हो। यो क्रूर युद्धको अन्त्य गर्न र सबै जीवित बन्धकहरू तथा अवशेषहरूलाई उनीहरूका परिवारसम्म फर्काउन यो महत्त्वपूर्ण छ।’
इजरायलले ७ अक्टोबर २०२३ मा हमासको आक्रमणको जवाफमा गाजामा सैन्य अभियान शुरू गरेको थियो। उक्त आक्रमणमा १,२०० मानिस मारिएका थिए भने २५१ जनालाई बन्धक बनाइएको थियो। इजरायली अभियानले हालसम्म ५२,८०० भन्दा बढी प्यालेस्टाइनीहरूको ज्यान लिएको स्थानीय स्वास्थ्य अधिकारीहरूले बताएका छन्। यो युद्धले गाजा पट्टीलाई तहसनहस पारेको छ।
कतार र इजिप्टले संयुक्त वक्तव्यमा अलेक्जान्डरको रिहाइलाई युद्धविराम वार्ता पुनः शुरू गर्ने दिशामा ‘प्रोत्साहनजनक’ कदम भनेका छन्। दुवै देशले संयुक्त राज्य अमेरिकासँग मिलेर गाजामा स्थायी युद्धविराम र युद्धको अन्त्यका लागि प्रयास जारी राख्ने प्रतिबद्धता व्यक्त गरेका छन्।