प्रकाशित मिति : चैत्र ३०, २०८१ शनिबार
अमेरिकाबाट गल्तीले देश निकाला गरिएका व्यक्ति सुरक्षित रहेको अधिकारीहरुले बताएका छन । उनीहरुले ति व्यक्ति एल साल्भाडोरको जेलमा सुरक्षित रहेको बताएका हुन ।
मेरील्याण्ड राज्यबाट गल्तीले निर्वासित गरिएका किलमार अब्रेगो गार्सिया एल साल्भाडोरको जेलमा सुरक्षित रहेको अमेरिकी अधिकारीले न्यायाधीशलाई जानकारी दिएका छन् ।
अमेरिकी सर्वोच्च अदालतले ट्रम्प प्रशासनलाई उनको रिहाइ र अमेरिका फर्काउने प्रक्रिया अघि बढाउन आदेश दिएपछि अमेरिकी अधिकारीहरुले यो जानकारी बाहिर ल्याएका हुन ।
अब्रेगो गार्सिया अहिले एल साल्भाडोरको आतंकवादी थुनावट केन्द्रमा राखिएका अमेरिकी विदेश मन्त्रालयका अधिकारी माइकल कोजाकले बताए ।
राष्ट्रपति डोनाल्ड ट्रम्पले सोमबार एल साल्भाडोरका राष्ट्रपति नायिब बुकेलसँग व्हाइट हाउसमा भेटवार्ता गर्न लागेका छन्।
गत महिना ट्रम्प प्रशासनले २३८ भेनेजुएली र २३ एल साल्भाडोरेली आप्रवासीहरूलाई एल साल्भाडोरको चर्चित जेलमा पठाएको थियो । गार्सियालाई पनि त्यही समूहमा पठाइएको थियो ।
अमेरिकाले गार्सियालाई प्रशासनिक त्रुटिका कारण निर्वासित गरिएको बताएको छ । यद्यपि सरकारले उनलाई कुख्यात एमएस १३ गिरोहको सदस्य भएको दाबी गरेको छ । उनका वकिलले यो आरोपलाई अस्वीकार गरेका छन् ।
सन् २०१९ मा आप्रवासन न्यायाधीशले गार्सियालाई देश निकाला नगर्न कानुनी संरक्षण प्रदान गरेका थिए ।
तर ट्रम्प प्रशासनले उनलाई पुनः अमेरिका फर्काउने आदेशको विरोध गर्दै मेरील्याण्ड जिल्ला न्यायाधीश पाउला जिनिसले आफ्नो अधिकार नाघेको आरोप लगाएको थियो ।
तर यस साता अमेरिकी सर्वोच्च अदालतले सर्वसम्मतिमा फैसला सुनाउँदै न्यायाधीश जिनिसको आदेशलाई समर्थन गरेको थियो ।
शुक्रबार न्यायाधीश जिनिसले ट्रम्प प्रशासनलाई गार्सियालाई फर्काउन के के कदम चालिएको छ भन्ने विवरण दैनिक रूपमा पेश गर्न निर्देशन दिएकी छन ।
२९ वर्षीय गार्सिया एल साल्भाडोरबाट किशोर अवस्थामा गैरकानुनी रूपमा अमेरिका प्रवेश गरेका थिए ।
सन् २०१९ मा मेरील्याण्डमा अन्य तीन व्यक्तिसँग पक्राउ परेपछि आप्रवासन अधिकारीले उनलाई हिरासतमा लिएका थिए ।