प्रकाशित मिति : फाल्गुन १३, २०८१ मंगलबार
अमेरिकाले रुसलाई युक्रेनी क्षेत्रबाट हटाउने संयुक्त राष्ट्रसंघको एक प्रस्तावको विपक्षमा मतदान गर्दै रुसलाई साथ दिएपनि नेपालले भने प्रस्तावको समर्थनमा मतदान गरेको छ । भारत र चीन लगायतका ६५ देश अनुपस्थीत रहेकोमा रुस र अमेरिका लगायतका १८ देशले प्रस्तावको विपक्षमा मतदान गरेका थिए भने नेपाल लगायत यूके, फ्रान्स, जर्मनी लगायतका ९३ देशले प्रस्तावको समर्थनमा मतदान गरेका थिए ।
रुस–युक्रेनबीच युद्ध सुरु भएयता पहिलोपटक अमेरिकाले युक्रेनविरुद्ध मतदान गरेको हो । यो प्रस्ताव रुस–युक्रेन युद्ध सुरु भएको तेस्रो वर्षगाँठमा गरिएको हो । युक्रेनमा रूसी आक्रमणको तेस्रो वर्षगाँठमा संयुक्त राष्ट्र संघमा अमेरिकाले दुई पटक रूसको पक्षमा मतदान गरेको हो । युद्धमा ट्रम्प प्रशासनको अडान परिवर्तन भएसँगै यो मतदान भएको हो ।
UN General Assembly ADOPTS resolution “Advancing a comprehensive, just and lasting peace in Ukraine”; calls for deescalation, early cessation of hostilities and peaceful resolution of the war against Ukraine
RESULT
In favor: 93
Against: 18
Abstain: 65 pic.twitter.com/VhQ5Y1W2il— UN News (@UN_News_Centre) February 24, 2025
पहिलो, अमेरिकाले मस्कोको कार्यको निन्दा गर्ने र युक्रेनको क्षेत्रीय अखण्डतालाई समर्थन गर्ने युरोपेली मस्यौदा प्रस्तावको विरोध गरेको थियो । न्यूयोर्कमा संयुक्त राष्ट्रसंघ महासभामा उक्त विरोधमा रसिया र उत्तर कोरिया र बेलारुस लगायतका देशहरूसँगै अमेरिकाले मतदान गरेको हो ।
संयुक्त राष्ट्र संघको महासभामा युक्रेनबारेको भोटमा हारेपछि अमेरिकाले युक्रेनमा रूसी आक्रमणको उल्लेख नगरी वा कुनै दोष नदिई तत्काल शान्तिको लागि आह्वान गर्ने आफ्नै प्रस्ताव भने संयुक्त राष्ट्रसंघको सुरक्षा परिषदमा अनुमोदन गराएको थियो । सुरक्षा परिषद्का प्रस्तावहरू कहिलेकाहीं उल्लङ्घन हुने गरेपनि कानुनी रूपमा बाध्यकारी मानिन्छ, जसले युद्धको अन्त्य गर्न वार्ता गर्न राष्ट्रपति ट्रम्पको दबाबलाई थप वजन दिन्छ। शब्दहरू परिमार्जन गर्ने प्रयासमा भिटो प्रयोग भएपछि दुई प्रमुख अमेरिकी सहयोगीहरू बेलायत र फ्रान्स भने यो मतदानमा सहभागी भएनन् ।
फ्रान्सेली राष्ट्रपति इमानुएल म्याक्रोनले युद्धको बारेमा उनीहरूको तीव्र मतभेदलाई सम्बोधन गर्ने प्रयासका साथ ह्वाइट हाउसमा राष्ट्रपति डोनाल्ड ट्रम्पलाई भेटेपछि संयुक्त राष्ट्रसंघमा ती प्रस्तावहरू प्रस्तुत गरिएको थियो। बिहीबार बेलायती प्रधानमन्त्री सर केयर स्टाररले पनि नयाँ अमेरिकी नेतालाई भेट्ने कार्यक्रम छ ।