प्रकाशित मिति : पुस १७, २०८१ बुधबार
अमेरिकाको होनोलुलु क्षेत्रमा भएको विष्फोटमा ३ जनाको मृत्यु भएको छ । २० जना गम्भीर घाइते भएका छन ।
नयाँ वर्षको पूर्वसन्ध्यामा भएको आतिशबाजी विष्फोटमा कम्तीमा तीनजनाको मृत्यु भएको र कम्तीमा २० जना गम्भीर घाइते भएको स्थानीय अधिकारीहरूले बताएका छन् ।
यो कुनै युद्ध क्षेत्रजस्तो देखिन्थ्यो, होनोलुलुका दमकल प्रमुख शेल्डन के हाओले भनेका छन । मध्यरातभन्दा केही अगाडि एउटा घरको बाहिर यो विष्फोट भएको होनोलुलु फायर डिपार्टमेन्टले विज्ञप्तिमा जनाएको छ ।
यो क्षेत्र होनोलुलुको अन्तर्राष्ट्रिय विमानस्थल र अमेरिकी वायु सेना र नौसेनाको संयुक्त बेस नजिकै रहेको छ । यो स्थान पर्ल हार्बरमा अमेरिकी युद्धपोत यूएसएस एरिजोना मेमोरियलबाट दुई माइलभन्दा केही टाढा रहेको छ ।
घटनास्थलमै दुईजनाको मृत्यु भएको र अन्य एकजनाको अस्पतालमा मृत्यु भएको हो ।
होनोलुलुका मेयर रिक ब्लाङ्गियार्डीको वक्तव्यअनुसार मृतकको संख्या तीन पुगेको छ । २० जनाभन्दा धेरै गम्भीर घाइते भएका छन् ।
यो घटना गैरकानुनी आतिशबाजीको कारण भएको बताइएको छ ।
हवाईका गभर्नर जोश ग्रीनका अनुसार १० वर्षमुनिका केही बालबालिका गम्भीर घाइते भएका छन् ।
उनले विस्फोटलाई एउटा बमको शक्ति बराबरको भएको बताए ।
दमकल विभागले विष्फोटको कारणबारे अनुसन्धान गरिरहेको जनाएको छ । उक्त घरमा कुनै आगलागी नभएको पुष्टि गरिएको छ ।
पीडितहरूको पहिचान तत्काल खुलाइएको छैन।
सामाजिक सञ्जालमा शहरको ठूलो क्षेत्रमा घरमै आतिशबाजी प्रज्वलन गरिएको भिडियो पोस्टहरू देखिएका छन्।