प्रकाशित मिति : मंसिर २०, २०८१ बिहीबार
एप्पलले नयाँ आरसीएस म्यासेजिङ प्रणाली अपनाएपछि धेरैले यसलाई टेक्स्ट म्यासेजिङतर्फको पुनरागमनको संकेत मानेका थिए। तर, अहिले एउटा अप्रत्याशित समस्या अगाडि आएको छ। एन्ड्रोइडदेखि एन्ड्रोइड वा आइफोनदेखि आइफोनको म्यासेजिङ सुरक्षित भए पनि यी दुई प्लेटफर्मबीचको म्यासेजिङ भने सुरक्षित छैन।
अब अमेरिकी संघीय अनुसन्धान ब्यूरो एफबीआई र साइबर सुरक्षा एजेन्सी सिसाले मानिसहरूलाई इनक्रिप्टेड म्यासेजिङ र कलको प्रयोग गर्न सुझाव दिएका छन्। यसको पृष्ठभूमि भने चीनको अमेरिकी नेटवर्कमा भइरहेको साइबर हमला हो, जसलाई साल्ट टाइफुन नाम दिइएको छ। यो आक्रमण पहिले अनुमान गरेभन्दा ठूलो र लगातार भइरहेको बताइएको छ।
हालैको रिपोर्टअनुसार यी आक्रमणबाट ठूला दूरसञ्चार कम्पनीहरूको नेटवर्क ह्याक भएको छ। केही सीमित सरकारी अधिकारी र राजनीतिमा संलग्न व्यक्तिहरूको निजी संचारसमेत प्रभावित भएको पुष्टि भएको छ।
अमेरिकी सरकारका एजेन्सीहरूले यो आक्रमणबारे संयुक्त चेतावनी जारी गरेका छन्। अमेरिकी सिनेटले यस विषयमा डिसेम्बर ११ मा सुनुवाइ गर्ने तयारी गरेको छ। यसै सन्दर्भमा, अमेरिकी नेताहरूले सञ्चार नेटवर्कको सुरक्षा सुनिश्चित गर्न नयाँ कदम चाल्ने प्रतिज्ञा गरेका छन्।
एन्ड्रोइड र आइफोनबीच आरसीएस प्रणालीमा इनक्रिप्शनको अभाव मुख्य समस्या हो। एन्ड्रोइड र आइफोन दुवैले इनक्रिप्टेड म्यासेजिङको महत्त्वलाई स्वीकारे पनि पूर्ण इनक्रिप्शनको लागि कुनै ठोस समयसीमा दिइएको छैन।
