प्रकाशित मिति : आश्विन २४, २०८१ बिहीबार
उत्तर कोरियाली सैनिकहरू युक्रेनमा रुसी सेनाको साथमा लडिरहेको भन्ने दक्षिण कोरियाको दाबीलाई रुसले अस्वीकार गरेको छ ।
यो अर्को झुटो समाचार जस्तो लाग्छ क्रेमलिनका प्रवक्ता दिमित्री पेस्कोभले टिप्पणी गर्नुभयो ।
युक्रेनको किएभ पोस्टले गुप्तचर स्रोतहरूलाई उद्धृत गर्दै डोनेट्स्क नजिकैको रुसी कब्जामा रहेको क्षेत्रमा युक्रेनी क्षेप्यास्त्र आक्रमणमा ६ जना उत्तर कोरियाली सैन्य अधिकारी मारिएको बताएको थियो ।
दक्षिण कोरियाका रक्षामन्त्री किम योङ–ह्युनले सांसदहरूलाई उक्त रिपोर्ट सम्भवतः सही भएको बताउनुभयो ।
रुस र उत्तर कोरियाबीच सैन्य गठबन्धन जस्तै पारस्परिक सम्झौताहरूका कारण नियमित सेना तैनाथ गर्ने विषय अत्यन्त सम्भावनायुक्त रहेको दक्षिण कोरियाको भनाई छ ।
डोनेट्स्क क्षेत्रको युद्ध क्षेत्रमा उत्तर कोरियाका ‘थोरै सङ्ख्यामा युद्ध इन्जिनियरहरू’ रहेको युक्रेनको दुष्प्रचारविरोधी केन्द्रका प्रमुख लेफ्टिनेन्ट आन्द्रिय कोभालेन्कोले शनिबार टेलिग्राममा लेख्नुभएको थियो ।
उहाँले तिनीहरूले प्योङयाङको गोलाबारुदको प्रयोगको अनुगमन गरिरहेको बताउनुभयो ।
उहाँका अनुसार रुस बढ्दो रूपमा उत्तर कोरियाली गोलबारुदमा निर्भर छ । तर ती गोलाबारुद उत्तर कोरियाली क्षेप्यास्त्रहरूभन्दा ‘निम्न गुणस्तर’ का छन् ।
उत्तर कोरियाली क्षेप्यास्त्रहरू युक्रेनमा रुसी सेनाद्वारा तैनाथ गरिएको विशेषज्ञहरूले लामो समयदेखि भन्दै आएका छन् । मस्को र प्योङयाङ दुवैले उक्त दाबीलाई अस्वीकार गरेका छन् ।
प्योङयाङले युक्रेनमा प्रयोग गर्न रुसलाई हजारौँ कन्टेनर हतियार पठाएको दक्षिण कोरियाले पनि दाबी गरेको छ ।
आणविक सशस्त्र उत्तर कोरियाले हालैका वर्षहरूमा सार्वजनिक रूपमा मस्कोसँग सैन्य सम्बन्ध सुदृढ बनाएको छ ।
रुसी राष्ट्रपति भ्लादिमिर पुटिनले जुनमा प्योङयाङको दुर्लभ भ्रमण गर्नुहुँदा उत्तर कोरियाली नेता किम जोङ उनसँग पारस्परिक रक्षा सम्झौतामा हस्ताक्षर गर्नुभएको थियो ।
