प्रकाशित मिति : श्रावण १९, २०८१ शनिबार
नेपाल समाजवादी पार्टीका अध्यक्ष तथा पूर्वप्रधानमन्त्री डा. बाबुराम भट्टराईले राष्ट्रिय स्वतन्त्र पार्टी (रास्वपा)का उपाध्यक्ष स्वर्णिम वाग्लेले दिएको अभिव्यक्ति बेलैमा सच्याउन सुझाव दिनुभएको छ ।
पूर्वप्रधानमन्त्री भट्टराईले सामाजिक सञ्जालमार्फत अभिव्यक्ति बेलैमा सच्याउन वाग्लेलाई सुझाव दिनुभएको हो । उहाँले मन्रो डक्ट्रिन जस्तो एउटा सार्वभौम देशमा अर्को देशको प्रभाव क्षेत्र कायम गर्ने कुरा किमार्थ स्वीकार्य हुन नसक्ने बताउनुभयो ।
उहाँले नेपालजस्तो दुई ठुला देशको बीचमा रहेको मुलुकका निम्ति यो झन् अकल्पनीय कुरा रहेको उल्लेख गर्नुभएको छ ।
डा. बाबुराम भट्टराईले सामाजिक सञ्जालमा लेख्नुभएको छ “‘मन्रो डक्ट्रिन’जस्तो एउटा सार्वभौम देश/क्षेत्रमा अर्को देशको प्रभाव क्षेत्र कायम गर्ने कुरा किमार्थ स्वीकार्य हुन सक्दैन ! नेपालजस्तो दुई ठुला देशको बीचमा रहेको मुलुक निम्ति त झन् अकल्पनीय कुरा हो ! स्वर्णिम वाग्लेले बेलैमा भुल सच्याउनु राम्रो होला ।”
रास्वपा अपाध्यक्ष वाग्लेले भारतले आफ्नो प्रभुत्व जमाउन खोजेको र नेपालले त्यो कुरा बुझिदिनुपर्ने आसयको अभिव्यक्ति दिनुभएको थियो । त्यसपछि वाग्लेको उक्त अभिव्यक्तिको आलोचना भइरहेको छ ।
