प्रकाशित मिति : २१ जेष्ठ २०८३, बिहिबार
photo:DHS
डिपार्टमेन्ट अफ होमल्यान्ड सेक्युरिटीले पदमुक्त गरिएकी पूर्व सेक्रेटरी क्रिस्ती नोएमको कार्यकालमा सुरु गरिएका अधिकांश विचाराधीन सम्झौताहरू रद्द गर्दैछ। वर्तमान सेक्रेटरीले बुधबार दिएको जानकारी अनुसार, संसदीय छानबिन र आन्तरिक निगरानी निकायको समीक्षापछि यो कदम चालिएको हो।
अमेरिकी प्रतिनिधि सभाको होमल्यान्ड सेक्युरिटी कमिटी समक्ष भएको सुनुवाइका क्रममा सेक्रेटरी मार्कवेन मुलिनले संघीय आप्रवासन अधिकारीहरूको तालिम अवधि पुनः बढाउने घोषणा पनि गरे। नोएमको कार्यकालमा कर्मचारी भर्ना बढाउने बहानामा तालिमको अवधि छोट्याइएको थियो, जसले गर्दा भर्ना भएका नयाँ कर्मचारीहरू पर्याप्त रूपमा दक्ष छन् कि छैनन् भन्नेबारे संसदमा दुवै पक्षले चिन्ता व्यक्त गरेका थिए। मुलिनको यो निर्णयसँगै नोएमको उक्त निर्णय उल्टिएको छ।
एक जना वरिष्ठ डेमोक्र्याट सांसदले नोएमको पालाका सम्झौताहरू खारेज गर्न के-कस्ता कदम चालिएका छन् भनी सोधेको प्रश्नको जवाफमा मुलिनले भने, “हामीले अहिलेसम्म हस्ताक्षर नभएका सम्झौताहरूको अध्ययन गरिरहेका थियौँ र तीमध्ये अधिकांशलाई रद्द गरिदिएका छौँ।
यो कदम नोएमको कार्यकालमा भएका सम्झौता प्रक्रियाहरूको खारेजी र परिमार्जन गर्ने मुलिनको वृहत्तर प्रयासको एउटा हिस्सा हो, जसको दुवै दलका सांसदहरूले आलोचना गरेका थिए।
राष्ट्रपति डोनाल्ड ट्रम्पले गत मार्च महिनामा नोएमलाई पदबाट बर्खास्त गरेका थिए। नोएमलाई हटाउनुको पछाडि उनको आप्रवासन सम्बन्धी कडा नीतिको जनसमर्थन घट्दै जानु र मानक प्रक्रिया बाहिर गएर ठूला सम्झौताहरू गरिएको भन्दै रिपब्लिकन सांसदहरूले समेत चिन्ता व्यक्त गर्नु मुख्य कारण थियो। बर्खास्त हुनुभन्दा केही दिन अघि रिपब्लिकन पार्टीसँग जोडिएका कम्पनीहरूलाई २२० मिलियन डलरको विज्ञापन अभियानको ठेक्का दिएको विषयमा सांसदहरूले नोएममाथि कडा प्रश्न उठाएका थिए।
त्यस समयमा नोएमले उक्त ठेक्का प्रतिस्पर्धात्मक प्रक्रिया मार्फत दिइएको र त्यसमा कुनै पनि राजनीतिक नियुक्तिका व्यक्तिहरू संलग्न नरहेको दाबी गरेकी थिइन्। नोएम हाल अमेरिकी विदेश मन्त्रालयको ‘शिल्ड अफ द अमेरिकाज’मा विशेष दूतको रूपमा कार्यरत छिन्। यस विषयमा विदेश मन्त्रालयले तत्काल कुनै प्रतिक्रिया दिएको छैन।
सेक्रेटरी मुलिनले पूर्ण रूपमा टुंगिसकेका सम्झौताहरूलाई सहजै खारेज गर्न नसकिने बताए। उनले इन्स्पेक्टर जनरलको कार्यालयले धेरै वटा विषयमा अनुसन्धान गरिरहेको भए तापनि आफूलाई त्यसको विस्तृत विवरणबारे जानकारी नगराइएको उल्लेख गरे। डेपुटी सेक्रेटरी ट्रोय एडगरले खुला रहेका सम्झौताहरूका बारेमा छलफल गर्न आफूहरूले इन्स्पेक्टर जनरलको कार्यालयसँग बैठक गरेको बताए।
समितिका शीर्ष डेमोक्र्याट सांसद बेन्नी थम्पसनले यदि कतै गडबडी भएको भए कारबाही हुनुपर्ने माग गरे। उनले भने,यदि कुनै कुरा गलत तरिकाले भएको थाहा छ भने, त्यसलाई रोक्नु तपाईंको दायित्व हो। हामी केवल सबै कडीहरू जोडेर मानिसहरूलाई जवाफदेही बनाउन चाहन्छौँ।
यस सम्बन्धमा होमल्यान्ड सेक्युरिटीका प्रवक्ताले मुलिनले मन्त्रालयले अमेरिकी करदाताहरूको हितमा प्रभावकारी रूपमा काम गरिरहेको सुनिश्चित गर्न सम्झौता प्रक्रियाहरूको पुनरावलोकन गरेको जानकारी दिए।
मुलिनले आइसका नयाँ कमाण्डोहरूको ७२ दिने तालिमको समयावधिलाई पुनः लागू गरिने बताए। यसअघि छिटो परिचालन गर्ने उद्देश्यले नोएमको पालामा यो अवधिलाई छोट्याइएको थियो।
“हामीले पाठ्यक्रम परिमार्जन गर्नुपर्यो, मुलिनले भने, “जुलाई १ देखि सुरु हुने सबै तालिमहरू पुनः पुरानै मापदण्ड अनुसार हुनेछन्।
यसै क्रममा मुलिनले डेमोक्र्याटहरूले आइस माथि गरेको आलोचना र ट्रम्पको आप्रवासन नीति रंगभेदबाट प्रेरित भएको भन्ने आरोपको प्रतिवाद गरे। उनले भने,रंगभेद भन्ने शब्द निकै गैरजिम्मेवार तरिकाले बारम्बार प्रयोग गर्ने गरिएको छ। उनीहरूले केवल संसद्ले पारित गरेको कानुन कार्यान्वयन गरिरहेका छन्।
मुलिनले नोएमको कार्यकालमा खरिद गरिएका दुईवटा गल्फस्ट्रिम जि ७०० र एउटा बोइङ ७३७ जेट विमानको प्रयोगलाई लिएर पनि आलोचना खेप्नुपर्यो। भर्जिनियाका डेमोक्र्याट सांसद जेम्स वाकिनशॉले ती जेट विमानहरू बेच्न प्रतिबद्धता जनाउन दबाब दिएपछि मुलिनले ती विमानहरू आवश्यक रहेको दाबी गरे। आफूलाई सुरक्षित सञ्चार प्रणाली चाहिने र व्यावसायिक उडानबाट यात्रा गर्न नसकिने तर्क उनले गरे। बोइङ ७३७ विमानलाई ‘कार्यकारी शाखा’ को जिम्मा लगाइएको भए तापनि कुन अधिकारीहरूले त्यसको प्रयोग गरिरहेका छन् भन्ने कुरा उनले खुलाएनन्।