प्रकाशित मिति : १३ चैत्र २०८२, शुक्रबार
फोटो : एपी/रासस
अमेरिकी राष्ट्रपति डोनाल्ड ट्रम्पका विशेष दूत स्टिभ विटकोफले अमेरिका यसै साता इरानसँग वार्ता हुने अपेक्षामा रहेको बताएका छन्।
मध्यपूर्वमा तनाव जारी रहेकै अवस्थामा उनको यस्तो भनाइ सार्वजनिक भएको हो। उनले यसअघि प्रस्ताव गरिएको १५ बुँदे सम्झौतामा इरानले सकारात्मक प्रतिक्रिया दिने आशा समेत व्यक्त गरे।
यसैबीच, अमेरिकी विदेशमन्त्री मार्को रुबियोले फ्रान्समा सञ्चारकर्मीहरूसँग कुरा गर्दै अमेरिकाले आफ्नो सैन्य उद्देश्य चाँडै प्राप्त गर्ने उल्लेख गरे।
उनले इजरायलसँगको सहकार्यमा इरानमाथि भइरहेको आक्रमणका उद्देश्यहरू स्पष्ट रहेको बताए। रुबियोले स्थल सेना परिचालन नगरीकनै आफ्ना लक्ष्यहरू हासिल गर्न सकिने दाबी गर्दै निकट भविष्यमा आक्रमणको तीव्रता कम हुँदै जाने संकेत समेत दिए।
पछिल्ला केही घण्टामा इरानको राजधानी तेहरानमा शक्तिशाली आक्रमणहरू भएका छन्। इरानका अनुसार यसै महिना तेस्रो पटक बुशेहर परमाणु ऊर्जा केन्द्रलाई निशाना बनाइएको छ। यता इजरायलले केन्द्रीय इरानस्थित ‘अराक हेभी वाटर प्लान्ट’ मा प्रहार गरेको पुष्टि गरेको छ।
इरानी विदेशमन्त्री अब्बास अराघचीले अमेरिकी र इजरायली आक्रमणहरूले नागरिक क्षेत्रलाई लक्षित गरिरहेको आरोप लगाउँदै यसको “ठूलो मूल्य चुकाउनुपर्ने” चेतावनी दिएका छन्। खाडी क्षेत्रका अन्य देशहरूमा पनि यसको असर देखिएको छ।
संयुक्त अरब इमिरेट्स ले इरानबाट प्रहार गरिएका ब्यालिस्टिक मिसाइल र ड्रोनहरूलाई आफ्नो वायु प्रतिरक्षा प्रणालीले निष्क्रिय पारेको जनाएको छ।
साउदी अरेबियास्थित प्रिन्स सुल्तान एयरबेसमा भएको इरानी आक्रमणमा परी १२ जना अमेरिकी सैनिक घाइते भएका छन्।