प्रकाशित मिति : २० फाल्गुन २०८२, बुधबार
अमेरिकाले हिन्द महासागरमा इरानी युद्धपोत डुबाएको दाबी गरेको छ। अमेरिकी पनडुब्बीबाट प्रहार गरिएको टार्पिडोका कारण उक्त युद्धपोत डुबेको अमेरिकी दाबी छ।
टार्पिडो पानीमुनिबाट प्रहार गरिने एक शक्तिशाली विस्फोटक हतियार हो। यो पनडुब्बी वा युद्धपोतबाट छोडिने पानीभित्र चल्ने ‘मिसाइल’ जस्तै हो, जसले शत्रुको जहाज वा पनडुब्बीलाई निशाना बनाएर पानीको सतहमुनिबाटै विस्फोट गराउँछ।
अमेरिकी रक्षामन्त्री पेट हेगसेथले अमेरिकी पनडुब्बीले हिन्द महासागरमा रहेको इरानी युद्धपोतलाई टार्पिडो प्रहार गरी डुबाएको बताएका छन्। उनका अनुसार आक्रमणपछि जहाज पूर्ण रूपमा समुद्रमा मुनिको थियो।
हेगसेथले जहाजको नाम नखुलाए तापनि श्रीलंकाली अधिकारीहरूले बुधबार बिहान इरानको “इरिस डेना” नामक जहाज डुबेको जानकारी दिएपछि उनको यो भनाइ सार्वजनिक भएको हो। उक्त जहाज श्रीलंकाको दक्षिणी तटबाट करिब ४० किलोमिटर टाढा समुद्रमा डुबेको बताइएको छ।
श्रीलंकाली रक्षा अधिकारीका अनुसार उद्धार टोलीले जहाजबाट ८० जनाको शव फेला पारेका छन् भने ३२ जनालाई जीवितै उद्धार गरिएको छ। नौसेनाका प्रवक्ताले जहाजमा रहेका कागजातका आधारमा करिब १८० जना सवार रहेको अनुमान गरिएको बताएका छन्। उद्धार गरिएका व्यक्तिहरू गम्भीर घाइते भएकाले उनीहरूलाई दक्षिणी बन्दरगाह सहरस्थित अस्पतालमा उपचारका लागि लगिएको छ।
हेगसेथले अन्तर्राष्ट्रिय समुद्री क्षेत्रमा सुरक्षित मानिएको इरानी युद्धपोतलाई अमेरिकी पनडुब्बीले निशाना बनाएको बताएका हुन्। उनले यो घटनालाई “दोस्रो विश्वयुद्धपछि टार्पिडो प्रयोग गरेर शत्रुको जहाज डुबाइएको पहिलो घटना” भएको दाबी समेत गरेका छन्। यद्यपि, दोस्रो विश्वयुद्धपछि बेलायत र पाकिस्तानले पनि टार्पिडो प्रयोग गरेर जहाज डुबाएका उदाहरणहरू रहेका छन्।
अमेरिकी रक्षा मन्त्रालयले सार्वजनिक गरेको भिडियोमा टार्पिडो प्रहार भएपछि जहाजको पछिल्लो भाग माथि उठेर विस्फोट भएको देखिन्छ।
सन् २०१५ मा पहिलोपटक सञ्चालनमा आएको यो युद्धपोत इरानको दक्षिणी नौसैनिक बेडोसँग सम्बन्धित छ। यस बेडोले मुख्य रूपमा ‘स्ट्रेट अफ होर्मुज’ र ‘गल्फ अफ ओमान’ क्षेत्रमा तैनाथी गर्ने जिम्मेवारी पाएको छ।