प्रकाशित मिति : माघ २७, २०८२ मंगलबार
फाइल तस्वीर : आरोन मिथेस/एएफपी-रासस
सुन्तला रङका वस्त्रमा सजिएका दुई दर्जन बौद्ध भिक्षुहरूले मंगलबार २३०० माइल लामो ‘शान्तिका लागि पदयात्रा’ पूरा गर्दै राजधानी वासिङ्टन डी.सी. पुगेका छन्। ९ राज्य पार गर्दै गरिएको यो आध्यात्मिक यात्रामा हजारौं मानिसहरूले उनीहरूलाई स्वागत गरेका छन्।
भिक्षुहरूले तीन महिनाभन्दा बढी अघि टेक्सासबाट यात्रा सुरु गरेका थिए। उनीहरूले कहिलेकाहीँ नाङ्गो खुट्टामा र कहिलेकाहीँ कडा जाडो मौसम सहँदै अमेरिका र विश्वभर शान्ति, माया र करुणा फैलाउने उद्देश्य राखेका थिए।
वासिङ्टन आउँदा भर्जिनियाको ग्लोसेस्टर काउन्टीका ७४ वर्षीय बब एन्डरसनले भने, “हाम्रो देश र विश्वमा शान्तिको समर्थन गर्न सकिने सबै सम्भावित तरिकाबाट देखाउनुपर्छ। यो त्यसो गर्ने उत्कृष्ट माध्यम हो, त्यसैले म यहाँ आएको हुँ।”
भिक्षुहरू भन्छन्, “हामी विरोध गर्न होइन, हामीभित्र पहिल्यै रहेको शान्तिलाई जागृत गर्न हिँडिरहेका छौँ। यो पदयात्रा एक सरल तर अर्थपूर्ण सन्देश हो, एकता र दया हामी प्रत्येकभित्रबाट सुरु हुन्छ र परिवार, समुदाय तथा समाजसम्म फैलिन सक्छ।”
उनीहरू मंगलबार र बुधबार वासिङ्टनमा रहनेछन् भने बिहीबार नजिकैको मेरील्याण्ड राज्यको एनापोलिसमा पुगेर यात्रा समाप्त गर्ने योजना छ। यस यात्रामा उद्धार गरिएको ‘अलोका’ नामक कुकुर पनि सहभागी छ।
यस पदयात्रा अमेरिकी समाजमा बढ्दो तनावको समयमा भइरहेको छ, जसलाई आंशिक रूपमा राष्ट्रपति डोनाल्ड ट्रम्पको कडा आप्रवासन नीतिले उक्साएको बताइएको छ।