जोर्डनले सिरियाली क्षेत्रहरूमा किन आक्रमण गर्‍यो?

जोर्डनले आफ्ना एयर फोर्सले दक्षिणी सिरियामा रहेका ‘आतङ्ककारी सङ्गठनहरूका अड्डा’ मा प्रतिशोधात्मक आक्रमण गरेको जनाएको छ। ती अड्डाहरू गत साता जोर्डनको एक ग्रीक अर्थोडक्स चर्चमा भएको आक्रमणका आरोपीहरूसँग सम्बन्धित रहेको बताइएको छ।

जोर्डनको सशस्त्र बलले सामाजिक सञ्जाल ‘एक्स’ मा एक पोस्ट गर्दै भनेको छ, ‘रोयल एयर फोर्सका फाइटर जेटहरूले दक्षिण–पूर्वी सिरियामा रहेका धेरै आतङ्ककारी स्थलहरूलाई नष्ट गरिदिएका छन्।’

जोर्डनको सशस्त्र बलले थप्दै भनेको छ, ‘यस कारबाहीको परिणामस्वरूप आतङ्ककारी सङ्गठनका धेरै सदस्यहरू मारिनुका साथै घाइते भएका छन् र उनीहरूका कतिपय सवारीसाधनहरू पूर्ण रूपमा ध्वस्त भएका छन्।’

जोर्डनको सेनाले ‘एक्स’ मा गरेको अर्को पोस्टमा, ‘यो सैन्य कारबाही दमास्कस (सिरियाली सरकार) सँगको समन्वयमा सम्पन्न गरिएको थियो,’ भनी स्पष्ट पारेको छ।

अक्टोबर २३ मा भएको उक्त चर्च आक्रमणको जिम्मेवारी आतङ्ककारी समूह आईएसआईएस (आईएसआईएल) ले लिएको छ।

जोर्डनले आक्रमण गरिएका सटीक स्थानहरू वा हताहतीको निश्चित तथ्याङ्क भने सार्वजनिक गरेको छैन।

सिरियाले के भनिरहेको छ?

सिरियाले रातभर भएका आक्रमणहरूबारे जोर्डनले दिएको विवरणको खण्डन गरेको छ।

एक वक्तव्य जारी गर्दै सिरियाली विदेश मन्त्रालयले जोर्डनलाई उक्त आक्रमणप्रति आफ्नो ‘पूर्ण आपत्ति’ रहेको जानकारी गराएको छ। मन्त्रालयका अनुसार उक्त आक्रमण ‘सिरियाली पक्षसँग कुनै पूर्वसमन्वय वा पूर्वसूचना बिना’ गरिएको थियो।

विदेश मन्त्रालयका एक अधिकारीले एजेन्सीलाई बताएअनुसार ती हवाई हमलाहरू ‘विश्वासघातपूर्ण आक्रमण’ थिए।

सिरियाको आपतकालीन तथा विपद् व्यवस्थापन मन्त्रालयले आफ्ना टोलीहरू चारवटा स्थानमा भएका आक्रमणपछि उद्धार तथा राहत कार्यमा खटिएको जनाएको छ।

सिरियाको सिभिल डिफेन्स एजेन्सीले आक्रमणमा परेर ज्यान गुमाएकाहरूको शव निकालिएको बताएको छ। उत्तरपूर्वी डेरा प्रान्तको लाजात क्षेत्रस्थित ‘अल–टाफ’ गाउँको एउटा पालमा गरिएको हवाई आक्रमणमा तीन बालबालिका र एक महिलासहित एकै परिवारका पाँच सदस्यको मृत्यु भएको छ। उक्त आक्रमणमा परी परिवारका अन्य तीन सदस्य घाइते भएको एजेन्सीले जनाएको छ।

त्यसैगरी, डेरा ग्रामीण क्षेत्रस्थित नासिब नजिकैको ‘अल–शयाह’ फार्ममा गरिएको आक्रमणमा ८० वर्षीय एक वृद्धको मृत्यु भएको छ। उनको शवलाई डेरा राष्ट्रिय अस्पताल लगिएको थियो।

पश्चिमी डेरा ग्रामीण क्षेत्रको ‘ऐन अल–बासल’ क्षेत्रस्थित मुजायरिबमा एक घरलाई लक्ष्य गरी आक्रमण गरिएको थियो, तर त्यहाँ कुनै हताहती नभएको रिपोर्ट गरिएको छ।

उत्तरी सुवायदा ग्रामीण क्षेत्रको शुहाइब सहरमा गरिएको आक्रमणमा एक जनाको मृत्यु भएको छ।

सशस्त्र लडाकुहरू नभई सर्वसाधारण मारिएको सिरियाको आरोपबारे जोर्डनका तर्फबाट तत्काल कुनै प्रतिक्रिया आएको छैन।

यी आक्रमणहरूकै लगत्तै, सिरियाली भन्सार अधिकारीहरूले मङ्गलबार जोर्डनसँगको नासिब सीमा नाका बन्द गरिदिएका छन्, जुन यी दुई छिमेकी मुलुकहरूबीच यात्रु तथा व्यापारिक आवागमनको एकमात्र मार्ग हो।

जोर्डनले सिरियाली क्षेत्रहरूमा किन आक्रमण गर्‍यो?

जोर्डनका अनुसार सिरियाली भूभागमा गरिएका हमलाहरू काराक प्रान्तस्थित एक ग्रीक अर्थोडक्स चर्चमा भएको आक्रमणको जवाफी कारबाही थिए।

सोमबार, वरिष्ठ सरकारी सुरक्षा अधिकारीहरूले जोर्डनी सुरक्षा बलले दुई भाइ र उनका भिनाजुलाई गोली हानाहानपछि पक्राउ गरेको जनाएका छन्। ती व्यक्तिहरू गत शुक्रबार जोर्डनको अल्पसङ्ख्यक क्रिस्चियन समुदायमाथि भएको दुर्लभ आक्रमणमा संलग्न थिए, जसमा नौ जनाको ज्यान गएको थियो।

जोर्डनका जनसुरक्षा निर्देशक, मेजर जनरल ओबैदुल्लाह अल–मायताहले पक्राउ परेका तीन संदिग्धहरूको नाम हज्जा जैदान मोहम्मद, मेशाल जैदान मोहम्मद र अहमद सामी हुसेन रहेको खुलाएका छन्।

अन्त्येष्टिको समयमा भएको उक्त आक्रमणपछि जोर्डनका राजा अब्दुल्लाह दोस्रोले सुरक्षा निकायहरूलाई ‘फलामे मुक्का’ (आइरन फिस्ट) का साथ कडा कारबाही गर्न आदेश दिएका थिए।

जोर्डनका गृहमन्त्री माजिन अल–फर्रायहले ‘युवाहरूलाई चरमपन्थतर्फ धकेल्ने सम्पूर्ण परिस्थितिहरूको छानबिन गर्ने’ गरी अनुसन्धान सुरु गरिएको बताए।

‘यो फाइल अझै बन्द भएको छैन; अनुसन्धान अझै जारी छ। आजका मितिसम्म उनीहरू र अन्य चरमपन्थी सञ्जाल (सेल्स) बीच कुनै प्रत्यक्ष सम्बन्ध रहेको सङ्केत फेला परेको छैन,’ अल–फर्रायहले थपे।

के जोर्डनले विगतमा पनि सिरियाली भूभागमा आक्रमण गरेको छ?

जोर्डनले सन् २०२३ देखि सिरियामा धेरै पटक हवाई आक्रमण गरिसकेको छ, जहाँ उसले लागुऔषध तथा हतियार तस्करहरूलाई निशाना बनाएको दाबी गर्दै आएको छ।

ती सैन्य कारबाहीहरूमा कहिलेकाहीँ सर्वसाधारणहरू पनि परेका छन्।

सन् २०२४ को जनवरीमा जोर्डनले गरेको आक्रमणमा महिला तथा बालबालिका मारिएपछि ‘ह्युमन राइट्स वाच’ ले यसको जवाफदेहिताको माग गरेको थियो।

‘दक्षिणी सिरियाबाट हुने लागुऔषध तस्करीले जस्तोसुकै खतरा निम्त्याएको भए तापनि सर्वसाधारण मारिने गरी गरिएका सीमापार हवाई हमलाहरूको सूक्ष्म छानबिन हुनुपर्छ,’ ह्युमन राइट्स वाचले भनेको थियो।

जोर्डनी सशस्त्र बलले आफ्ना सीमावर्ती क्षेत्रहरूमा सञ्चालित कारबाहीहरू लागुऔषध, हतियार र विस्फोटक पदार्थ ओसारपसार गर्ने तथा इरान–सम्बद्ध समूहहरूसँग जोडिएको आशङ्का गरिएका सशस्त्र समूहहरूविरुद्ध लक्षित रहेको बताएको छ।

जोर्डनको पछिल्लो आक्रमणप्रति सिरियाले कसरी प्रतिक्रिया दिनेछ?

सिरियाको विदेश मन्त्रालयले यस सैन्य कारबाहीको परिस्थितिलाई स्पष्ट पार्न जोर्डनसँग सम्पर्कमा रहेको जनाएको छ।

दमास्कसले ‘सिरियाको सुरक्षा र सार्वभौमसत्ताको रक्षा गर्दै’ यी आक्रमणहरूबाट उत्पन्न परिस्थितिको सामना गर्ने बताएको छ। — अल जजिराबाट