प्रकाशित मिति : २५ असार २०८३, बिहिबार
राष्ट्रपति डोनाल्ड जे. ट्रम्प बुधबार, जुलाई ८, २०२६ का दिन संयुक्त बेस एण्ड्रयूज, मेरिल्याण्ड प्रस्थान गर्ने क्रममा अंकारा, टर्कीस्थित अंकारा एसेनबोगा अन्तर्राष्ट्रिय विमानस्थलमा एयर फोर्स वानमा सवार हुँदै। (आधिकारिक ह्वाइट हाउस फोटो: ड्यानियल टोरोक)
अमेरिकी राष्ट्रपति डोनाल्ड ट्रम्पलाई कतारले उपहार स्वरूप दिएको नयाँ ‘एयरफोर्स वान’ विमानमा नउड्न अमेरिकी गुप्तचर निकाय ‘सेक्रेट सर्भिस’ले सुझाव दिएको छ। बुधबार सार्वजनिक एक रिपोर्ट अनुसार टर्कीमा आयोजित नेटो शिखर सम्मेलनपछि फर्किने क्रममा ट्रम्पलाई सुरक्षा संवेदनशीलताका कारण सो नयाँ विमान प्रयोग नगर्न भनिएको हो।
इरानबाट आउन सक्ने सम्भावित सुरक्षा थ्रेटलाई मध्यनजर गर्दै ट्रम्प टर्कीको राजधानी अंकाराबाट पुरानै एयरफोर्स वान विमानमा फर्किएका थिए। यद्यपि, कुनै ठोस वा स्पष्ट खतरा भने पहिचान भइसकेको थिएन।
यस विषयमा सेक्रेट सर्भिसले ट्रम्पको सामाजिक सञ्जाल ‘ट्रुथ सोसल’को पोस्टलाई नै आधिकारिक जवाफको रूपमा लिन सङ्केत गरेको छ। ट्रम्पले भने विमान परिवर्तन हुनुमा कुनै सुरक्षा खतरा नरहेको दाबी गरेका छन्। उनले अमेरिकी सैनिकहरूको आग्रहमा कतारी विमानलाई बेलायतको आरएएफ मिल्डेनहल बेसमा पहिले नै पठाइएको र आफू सोही मार्ग हुँदै स्वदेश फर्किएको बताएका छन्।
कतारले ट्रम्पलाई उपहार दिएको नयाँ एयरफोर्स वान वास्तवमा बोइङ ७४७-८ कमर्सियल विमान हो, जसलाई डिफेन्स कन्ट्र्याक्टर एलथ्री ह्यारिसले राष्ट्रपतीय विमानको रूपमा परिमार्जन गरेको हो। यो विमान पुरानो एयरफोर्स वानभन्दा १८ फिट ४ इन्च लामो छ।
तर, पुरानो एयरफोर्स वानमा शीतयुद्धकालीन समयदेखि नै परीक्षित र अभेद्य रक्षा प्रणाली जडान गरिएको छ, जसले आउँदै गरेको एन्टी-एयरक्राफ्ट मिसाइललाई समेत निष्कृय पार्ने क्षमता राख्छ। नयाँ विमानमा अझै पनि मध्य-आकाशमा इन्धन भर्ने जस्ता केही सैन्य परिमार्जनहरू बाँकी नै रहेका कारण पुरानो विमान बढी सुरक्षित मानिएको हो।
यात्राका क्रममा ट्रम्पले पत्रकारहरूसँग कुरा गर्दै यो उडान खतरनाक हुन सक्ने टिप्पणी गरे। उनले इरानलाई ‘फटाह’ र ‘फोहोर’ को संज्ञा दिँदै व्यङ्ग्यात्मक शैलीमा भने, “यदि इरानले एयरफोर्स वानमा आक्रमण गर्यो भने तिमीहरू पनि मारिनेछौ। म गएँ भने, तिमीहरू पनि जानेछौ।”
यो घटना अमेरिका र इरानबीच हर्मुज जलडमरूमा पुनः तनाव बढेको भोलिपल्ट सार्वजनिक भएको हो। इरानले सो जलक्षेत्रमा तीनवटा जहाजमाथि गोलीबारी गरेपछि ट्रम्पले इरानसँगको अन्तरिम शान्ति सम्झौता ‘लगभग सकिएको’ घोषणा गर्दै इरानका नागरिक पूर्वाधारहरूलाई लक्षित गरी छिट्टै जवाफी हमला गरिने चेतावनी दिइसकेका छन्।