प्रकाशित मिति : २९ चैत्र २०८२, आइतबार
अमेरिकी नागरिकता तथा आप्रवासन सेवाको सहयोगमा गरिएको एक ठूलो अनुसन्धानपछि बोस्टनको सङ्घीय ग्रान्ड जुरीले १० जना भारतीय नागरिकहरूलाई भिसा ठगीको अभियोगमा दोषी ठहर गरेको छ। यी व्यक्तिहरूले अमेरिकाको ‘यू’ भिसा प्राप्त गर्नका लागि पसलहरूमा नक्कली सशस्त्र डकैतीको नाटक रचेको सनसनीपूर्ण खुलासा भएको छ।
अभियोगका अनुसार, यी प्रतिवादीहरूले सेटिङ मिलाएर विभिन्न स्टोरहरूमा सशस्त्र डकैती गर्न लगाएका थिए। यसको मुख्य उद्देश्य डकैतीको समयमा पसलमा रहेका क्लर्कहरूलाई “हिंस्रक अपराधको पीडित” देखाउनु थियो। अमेरिकामा गम्भीर अपराधको शिकार भएका र अनुसन्धानमा सहयोग गर्ने विदेशी नागरिकहरूलाई ‘यू’ भिसा दिने प्रावधान छ, जसको दुरुपयोग गर्दै उनीहरूले अध्यागमन आवेदनमा झूटो दाबी गरेका थिए।
यस योजनाका मुख्य योजनाकार रामभाई पटेल र सवारी चालक बलविंदर सिंहलाई यसअघि नै सन् २०२५ मा दोषी ठहर गरिसकिएको छ। हाल अभियोग लागेका १० जनामा जितेन्द्रकुमार पटेल, महेशकुमार पटेल, सञ्जयकुमार पटेल, दिपिकाबेन पटेल, रमेशभाई पटेल, अमिताभेन पटेल, रोनककुमार पटेल, संगीताबेन पटेल, मिन्केश पटेल र सोनल पटेल रहेका छन्। उनीहरू म्यासाचुसेट्स, केन्टकी, मिसिसिपी र ओहायो लगायतका विभिन्न राज्यमा बसोबास गर्दै आएका थिए।
अनुसन्धानका क्रममा देखिएअनुसार, डकैतीको नाटक गर्नका लागि नक्कली लुटेराले स्टोरमा पुगेर बन्दुक देखाउने र पैसा लिएर भाग्ने गर्थे। लुटेरा भागेको करिब ५ मिनेटपछि मात्र प्रहरीलाई खबर गरिन्थ्यो ताकि यो वास्तविक अपराध जस्तो देखियोस्। यस कार्यका लागि “पीडित” बन्ने क्लर्कहरूले मुख्य योजनाकार रामभाईलाई रकम बुझाउने गरेका थिए भने रामभाईले स्टोर मालिकहरूलाई उनीहरूको पसल प्रयोग गर्न दिएबापत रकम दिने गरेका थिए।
अमेरिकी न्यायाधिवक्ता लेह बी. फोलीका अनुसार, भिसा ठगीको षड्यन्त्र अन्तर्गत दोषी ठहरिएकाहरूलाई ५ वर्षसम्मको कैद, ३ वर्षको कडा निगरानी र २ लाख ५० हजार डलरसम्म जरिवाना हुन सक्छ। सजाय पूरा गरेपछि उनीहरू सबैलाई अमेरिकाबाट देस निकाला गरिनेछ। यस प्रकरणमा एफबीआई र विभिन्न राज्यका प्रहरी विभागहरूले लामो समयदेखि अनुसन्धान गरिरहेका थिए।