प्रकाशित मिति : २२ चैत्र २०८२, आइतबार
अमेरिकाको न्यूयोर्क शहरमा सात महिनाकी नाबालिका शिशुको गोली लागेर मृत्यु भएको छ। आफ्नै बालगाडी मा बसिरहेकी ती शिशुमाथि गोली प्रहार भएको थियो। उक्त घटनामा काओरी प्याटरसन मूर नाम गरेकी शिशुको ज्यान गएको हो।
प्रहरीका अनुसार ब्रुकलिनको विलियम्सबर्ग क्षेत्रमा मोटरसाइकलमा आएका दुई जनामध्ये पछाडि बसेका व्यक्तिले अचानक गोली चलाएका थिए। गोली प्रहारपछि मोटरसाइकल दुर्घटनामा परेको र चालक घटनास्थलबाट फरार भएको बताइएको छ।
उक्त दुर्घटनामा मोटरसाइकलबाट खसेर घाइते भएका अमुरी ग्रिनलाई उपचारका क्रममा प्रहरीले नियन्त्रणमा लिएको हो।
२१ वर्षीय ग्रिनलाई यस घटनाको मुख्य अभियुक्तका रूपमा पक्राउ गरिएको छ। उनीमाथि अवैध रूपमा हतियार राखेको, तीनवटा हत्या र एउटा हत्या प्रयासको गम्भीर आरोप लगाइएको छ। यद्यपि, अदालतमा उपस्थित गराइँदा ग्रिनले आफूमाथि लगाइएका सबै आरोप अस्वीकार गरेका छन्।
प्रारम्भिक अनुसन्धानले यो घटना ग्याङ (गिरोह) सम्बन्धी आक्रमण हुन सक्ने र निर्दोष शिशु त्यसको सिकार बनेको देखाएको छ। यसै घटनामा संलग्न रहेको आशंकामा १८ वर्षीय म्याथ्यु रोड्रिगेजलाई पेन्सिलभेनियाबाट पक्राउ गरिएको छ। उनीविरुद्ध पनि आवश्यक कानुनी प्रक्रिया अगाडि बढाइँदै छ।
यो घटनाले स्थानीय समुदायलाई गहिरो शोकमा डुबाएको छ। यसलाई अमेरिकामा बढ्दो बन्दुक हिंसाको एउटा दर्दनाक उदाहरणका रूपमा हेरिएको छ। विश्लेषकहरूका अनुसार यो घटनाले सर्वसाधारण नागरिकको सुरक्षामाथि गम्भीर प्रश्न उठाएको छ।