प्रकाशित मिति : माघ १५, २०८२ बिहीबार
फाइल तस्वीर
रूसले एक हजार युक्रेनी सैनिकका शव युक्रेनलाई फिर्ता गरेको छ। युक्रेनी अधिकारीहरूका अनुसार यो युद्धरत दुवै देशबीचको पछिल्लो शव आदान–प्रदान हो। बदलामा रूसले ३८ सैनिकका शव प्राप्त गरेको रूसी प्रमुख वार्ताकार भ्लादिमिर मेडिन्स्कीले बताएका छन्।
मेडिन्स्कीले सामाजिक सञ्जाल टेलिग्राममा आदान–प्रदानको तस्बिर सार्वजनिक गरेका छन्, जसमा जैविक जोखिमबाट जोगिन प्रयोग गरिने सुरक्षात्मक पोसाक लगाएका व्यक्तिहरू र शव ढुवानीका लागि प्रयोग गरिने सेता रिफ्रिजरेटेड ट्रकहरू देखिन्छन्।
झन्डै चार वर्षदेखि जारी युद्धका क्रममा रूस र युक्रेनले हजारौँ सैनिकका शव आदान–प्रदान गरिसकेका छन्। पछिल्लो आदान–प्रदान सन् २०२५ मा इस्तानबुलमा भएको वार्तामा दुवै पक्षबीच भएको सम्झौताअनुसार सम्पन्न भएको हो। उक्त सम्झौताअन्तर्गत १२ हजार सैनिकको शव फिर्ता गर्ने साथै सबै बिरामी, गम्भीर घाइते र २५ वर्षमुनिका युद्धबन्दीहरू रिहा गर्ने सहमति भएको थियो।
यसअघि गत वर्ष नोभेम्बरमा रूसले युक्रेनलाई एक हजार शव फिर्ता गरेको थियो भने बदलामा ३० शव प्राप्त गरेको थियो। तर, अक्टोबर २०२५ यता युद्धबन्दीहरूको औपचारिक आदान–प्रदान भने हुन सकेको थिएन, जसका लागि दुवै पक्षले एक–अर्कालाई ढिलासुस्तीको आरोप लगाइरहेका छन्।
यसैबीच, फेब्रुअरी २०२२ मा सुरु भएको रूसको पूर्णस्तरीय आक्रमणको चौथो वार्षिकोत्सव नजिकिँदै गर्दा शान्ति सम्झौताका प्रयासहरू पनि तीव्र बनेका छन्। गत हप्ता रूस, युक्रेन र अमेरिकाका वार्ताकारहरू संयुक्त अरब इमिरेट्समा भेट भई त्रिपक्षीय वार्ता गरेका थिए। सबै पक्षले वार्तालाई सकारात्मक भने पनि डोनेत्स्क क्षेत्रसँग सम्बन्धित जस्ता मुख्य क्षेत्रीय विवादहरू अझै समाधान हुन सकेका छैनन्।
वार्ताको प्रयास जारी रहे पनि, युद्धको असर भने जारी नै छ। मंगलबार युक्रेनको खार्किभ क्षेत्रमा यात्रु ट्रेनमा रूसी ड्रोन आक्रमण हुँदा कम्तीमा पाँच जनाको मृत्यु भएको छ। साथै, हालैका महिनाहरूमा रूसले युक्रेनका महत्वपूर्ण पूर्वाधारहरूमा आक्रमण बढाएको छ, जसका कारण धेरै नागरिकहरू कठ्याङ्ग्रिने जाडोमा तताउने सुविधा र बिजुली बिना जीवनयापन गर्न बाध्य भएका छन्।