प्रकाशित मिति : मंसिर २, २०८१ आईतबार
आर्थिक बर्ष २०२४ का ९ महिनामा ९ हजार १० जना नेपालीहरुले अमेरिकाको ग्रिनकार्ड प्राप्त गरेको तथ्यांक अमेरिकी सररकारको डिपार्टमेन्ट अफ होमल्याण्ड सेक्युरिटीले सार्वजनिक गरेको छ । जसमध्ये अमेरिका आइसकेपछि ग्रिनकार्ड आवेदन दिएर ग्रिनकार्ड प्राप्त गर्नेहरु ३ हजार १ सय ७० र नेपालबाटै आप्रवासी भिसामा आउनेहरु ५ हजार ८ सय ४० छन् ।
यीमध्ये पहिलो क्वार्टरमा २३८०, दोश्रो क्वार्टरमा २७८० र तेश्रो क्वार्टरमा ३८६० जना नेपालीहरुले अमेरिकाको ग्रिनकार्ड प्राप्त गरेका छन् । योसँगै विगत १२ बर्षमा अमेरिकाको ग्रिनकार्ड पाउने नेपालीहरुको संख्या १ लाख ३५ हजार नाघेको छ । आर्थिक बर्ष २०२४ मा अनुमानित झण्डै १२ हजार नेपालीले अमेरिकाको ग्रिनकार्ड पाएका छन् ।
गत आर्थिक बर्ष २०२३ मा कुल ११६४० जना नेपालीहरुले अमेरिकाको ग्रिनकार्ड पाएका थिए । जसमध्ये अमेरिका आइसकेपछि ग्रिनकार्ड आवेदन दिएर ग्रिनकार्ड प्राप्त गर्नेहरु ४ हजार ८० र नेपालबाटै आप्रवासी भिसामा आउनेहरु ७ हजार ५ सय ६० रहेका थिए । यो संख्यामा ३३७५ डिभी लोटरी विजेताहरु र १ हजारको हाराहारीमा एसाइलमबाट ग्रिनकार्ड पाउनेहरु थिए । अर्थात् रोजगार र परिवारमा आधारित ग्रिनकार्ड पाउनेहरु ८ हजारको हाराहारीमा थिए ।
अघिल्लो आर्थिक बर्ष २०२२ को तथ्यांक हेर्दा १२ हजार १० जना नेपालीहरुले अमेरिकाको ग्रिनकार्ड पाएका थिए । तीमध्ये २८९४ जना डिभी लोटरीमार्फत र १२६२ जनाले एसाइलममार्फत ग्रिनकार्ड प्राप्त गरेका थिए । झण्डै ८ हजार नेपालीहरुले परिवार र रोजगारमा आधारित ग्रिनकार्ड पाउन सफल भएका थिए ।
तथ्यांक हेर्दा सन् २०१३ मा १३ हजार ४६, सन् २०१४ मा १२ हजार ३ सय ५७, सन् २०१५ मा १२ हजार ९ सय २६, सन् २०१६ मा १२ हजार ८५१, सन् २०१७ मा ११ हजार ६ सय १०, सन् २०१८ मा ११ हजार ९ सय ५३, सन् २०१९ मा १० हजार २ सय १ जना नेपालीले अमेरिकाको ग्रिनकार्ड पाएका थिए । कोरोना महामारीका बाबजुत २०२० मा ७ हजार ८ सय ४७ र २०२१ मा ७ हजार ३ सय ९ नेपालीले अमेरिकाको ग्रिनकार्ड पाएका थिए ।
२०१३ अगाडिको समेत तथ्यांक जोड्दा अहिलेसम्म २ लाख ६ हजार ५ सय ४ जना नेपालीहरुले अमेरिकाको ग्रिनकार्ड लिइसकेका छन् । जसमध्ये झण्डै ८७ हजारले अमेरिकी नागरिकता प्राप्त गरिसकेका छन् ।
