काठमाडौं । शुक्रबारदेखि प्रदर्शन तयारीमा रहेको नेपाली एनिमेटेड फिल्म ‘सलिना : योद्धा राजकुमारी’को रिलिज अन्तिम समयमा स्थगित भएको छ । हलले कम शो दिएपछि प्रदर्शनलाई तत्काल रोक्नुपरेको वितरक मनोज राठीले जानकारी दिए ।
‘हलले निकै कम शो दिएपछि निर्माताले पोस्टपोन्ड गर्न आग्रह गर्नुभयो । सोहीअनुसार अहिलेलाई रोकेका हौं,’ राठीले भने, ‘उपयुक्त समयमा प्रदर्शन मिति तय गर्नेछौं ।’
केही हलले शो समेत सार्वजनिक गरेका थिए । मुलुकको पहिलो एनिमेटेड फिल्मलाई प्रोत्साहन गर्नुको सट्टा कम शो दिएर हेपाहा प्रवृत्ति देखाएको निर्मात्री तथा सम्पादक श्रुति श्रेष्ठले बताइन् ।
एकातिर हलले कम शो दिएको र अर्कोतिर एसईई लगायतका परीक्षा पनि सुरु भएकाले तत्काललाई प्रदर्शन स्थगित गर्नुपरेको उनको भनाइ छ । उपयुक्त समयमा फिल्म ल्याउने उनले जनाइन् ।
शुक्रबार नेपालमा बलिउडको ‘क्रू’ र हलिउडको ‘गोडजिला भर्सेस कङ : द न्यु अम्पायर’ रिलिज हुँदैछन् ।
