प्रकाशित मिति : कार्तिक २, २०८२ आईतबार
अमेरिकाले गाजा क्षेत्रमा हमासले नागरिकमाथि हमला गर्ने तयारी गरेको दाबी गरेको छ। विदेश मन्त्रालयले गाजामा हमासद्वारा नागरिकमाथि हमला गर्ने विश्वसनीय रिपोर्टहरू प्राप्त भएको दाबी गरेको हो।
मन्त्रालयका अनुसार आक्रमण हमासले गाजाका नागरिकमाथि गरेमा वर्तमान युद्धविराम सम्झौताका सर्तहरूको प्रत्यक्ष उल्लङ्घन हुने चेतावनी दिएको छ।
प्यालेस्टिनीहरूमाथि नियोजित हमला युद्धविराम सम्झौताविरुद्ध गम्भीर र प्रत्यक्ष उल्लङ्घन हुने र मध्यस्थताबाट प्राप्त प्रगतिलाई कमजोर पार्ने मन्त्रालयले निकालेको विज्ञप्तिमा भनिएको छ।
विदेश मन्त्रालयले आक्रमणको विवरण खुलाएको छैन। ती रिपोर्टहरू कुन स्रोतबाट प्राप्त भए भन्ने पनि स्पष्ट पारेको छैन।
हाल हमास र इजरायलबीचको युद्धविराम सम्झौताको पहिलो चरणअन्तर्गत सबै जीवित बन्धकहरू मुक्त गरिएका छन्। मृतकहरूको शव अझै फिर्ता ल्याउने प्रक्रिया जारी रहेको छ।
सम्झौताअनुसार, इजरायलले आफ्ना जेलमा रहेका २५० जना प्यालेस्टिनी कैदी र गाजाबाट पक्राउ परेका १,७१८ बन्दीहरूलाई मुक्त गरेको छ।
अमेरिकाले गाजाको शान्ति सम्झौताका अन्य साझेदार देशहरू इजिप्ट, कतार र टर्कीलाई पनि सूचित गर्दै हमासले सम्झौताका सर्तहरू पालन गर्नुपर्ने आग्रह गरेको छ।
यस विषयमा हमासले अहिलेसम्म कुनै आधिकारिक टिप्पणी गरेको छैन। अमेरिकी राष्ट्रपति डोनाल्ड ट्रम्पले यसअघि हमासलाई नागरिक हत्या नगर्न चेतावनी दिएका थिए।
उनले अमेरिकी सेना गाजामा पठाउने योजना भने नभएको स्पष्ट पारेका छन्।
शनिबार इजरायलले गाजाबाट दुई बन्धकको शव फिर्ता पाएको जनाएको छ। ती शवहरूको औपचारिक पहिचान अझै बाँकी छ।
अहिलेसम्म २८ मध्ये १० जना मृत बन्धकका शवहरू इजरायल फिर्ता ल्याइएका छन्। प्रधानमन्त्री बेन्जामिन नेतन्याहूले हमासले बाँकी शवहरू नफर्काएसम्म रफाह सीमा नाका बन्द रहने बताएका छन्।
रफाह नाका गाजाका प्यालेस्टिनीहरूको लागि चिकित्सकीय सहायता लिन बाहिर जान वा फर्कन अत्यन्तै महत्त्वपूर्ण प्रवेशद्वार मानिन्छ।
इजरायली ट्याङ्कको गोलीबाट गाजामा एकै परिवारका ११ सदस्यको शनिबार मृत्यु भएको हमास नियन्त्रित नागरिक सुरक्षा मन्त्रालयले जनाएको छ।
यो युद्धविराम सुरु भएपछिको सबैभन्दा घातक घटना मानिएको छ।
इजरायलले गाजामा हालको सैन्य अभियान ७ अक्टोबर २०२३ मा हमासद्वारा दक्षिण इजरायलमा गरिएको आक्रमणपछि सुरु गरेको हो। हमासको आक्रमणमा १,२०० जना मारिएका थिए र २५१ जना बन्धक बनाइएका थिए।
गाजा स्वास्थ्य मन्त्रालयका अनुसार, त्यसपछि सुरु भएको इजरायली आक्रमणमा कम्तीमा ६८,००० जना मारिएका छन्।
गाजाको परिस्थितिमा हालैको युद्धविरामले केही राहत ल्याए पनि अमेरिकी चेतावनीले असुरक्षा र अविश्वास अझै गहिरो छ भन्ने देखाएको छ।