प्रकाशित मिति : जेष्ठ १९, २०८१ शनिबार
अमेरिकाको राष्ट्रिय सुरक्षा एजेन्सी एनएसएले आईफोन र एन्ड्रोइड प्रयोगकर्तालाई आफ्नो फोन अफ गरेर अन गर्न चेतावनी दएको छ । राष्ट्रिय सुरक्षा एजेन्सीले नै नागरिकको फोनमा जासुसी गर्न सक्ने केही व्यक्तिहरूको चिन्ताको बाबजुत एजेन्सीले आईफोन र एन्ड्रोइड प्रयोगकर्ताहरूलाई आफ्नो फोन अफ गरेर अन गर्न सुझाव दिएको छ । कम्तीमा हप्तामा एकपटक यसो गर्न सुझाव दिइएको छ ।
तपाइँ कति पटक आफ्नो आईफोन वा एन्ड्रोइड फोन बन्द गर्नुहुन्छ? यसलाई पूर्ण रूपमा बन्द गरेर सुरुबाटै अन गर्न सुझाव दिइएको हो । केवल स्ट्यान्डबाई मोडमा नगई पूरै अफ गरेर अन गर्ने काम केही व्यक्तिले अपरेटिङ सिस्टम अपडेट गर्दामात्र गर्न सक्छन् । तर अमेरिकाको राष्ट्रिय सुरक्षा एजेन्सीका अनुशार केबल अपरेटिङ सिस्टम अपडेट गर्दामात्र फोन अफ गर्नु एक ठूलो गल्ती हुन सक्छ।
धेरै मोबाइल उपकरणहरूका उत्कृष्ट अभ्यासहरूको विवरण दिने कागजातमा राष्ट्रिय सुरक्षा एजेन्सीले प्रयोगकर्ताहरूलाई आफ्ना उपकरणहरु हप्तामा एकपटक बन्द गर्न र डाटाहरु चोरी हुनबाट जोगाउन सिफारिस गरेको छ । यसो गर्दा ह्याकरहरुले प्रायः फोनबाट डाटा चोर्न गर्न प्रयोग गर्ने शुन्य क्लिक विधिमा असफलता पाउनेछन् ।
यसो गर्दा प्रयोगकर्ताहरूले फिसिङको खतरालाई कम गर्न सक्छन् भने मालवेयर र स्पाइवेयरको खतरा पनि कम गर्न सक्छन् । तर राष्ट्रिय सुरक्षा एजेन्सीका अनुशार फोन अफ गरेर अन गर्दा कहिलेकाहीँमात्र यस्ता आक्रमणहरूलाई सफल हुनबाट रोक्न सकिन्छ। सबैप्रकारका आक्रमणहरु भने फोन अफ गरेर अन गर्दैमा रोक्न सकिन्न ।
मोबाइल उपकरणहरूमा खतराहरू कायम रहेको र यसको दायरा तथा जटिलता बढ्दै गएको राष्ट्रिय सुरक्षा एजेन्सीको भनाई छ । केही स्मार्टफोनहरूले सुविधा र क्षमता प्रदान गरेपनि सुरक्षा खतरा भने बढाउने गरेका छन् । त्यसैले केहि गर्नु सधैं केहि नगर्नु भन्दा राम्रो हुने भएकाले फोन अफ गरेर अन गर्न सुझाव दिइएको हो ।
दिइएको सल्लाहले सबै सुरक्षा खतराहरु भने समाधान गर्दैन । राष्ट्रिय सुरक्षा एजेन्सीको कागजातले एउटा चार्ट समावेश गरेको छ जसले प्रत्येक रणनीति विभिन्न खतराहरू विरुद्ध कति प्रभावकारी छ भन्ने देखाउँछ । फोन बन्द गरेर फेरि अन गर्दामात्र रिबुटमा पुनः लोड गर्न प्रोग्राम गरिएका धेरै उन्नत मालवेयर र स्पाइवेयर खतराहरू विरुद्ध लड्न भने मद्दत गर्दैन।
राष्ट्रिय सुरक्षा एजेन्सीले फोन प्रयोगकर्ताहरूलाई ब्लुटुथ प्रयोग नगर्दा बन्द गर्न, अपरेटिङ सिस्टम र एप्लिकेसनमा अपडेटहरू उपलब्ध हुँदा जति सक्दो चाँडो अपडेट गर्न र आवश्यक नहुँदा लोकेशन सर्भिस बन्द गर्न सल्लाह दिएको छ । सार्वजनिक वाईफाई नेटवर्कहरू प्रयोग नगर्न र सार्वजनिक चार्जिङ स्टेशनहरू प्रयोग नगर्न समेत सुझाव दिइएको छ ।
