प्रकाशित मिति : श्रावण २४, २०८१ बिहीबार
बिहिबार सार्वजनिक सेप्टेम्बरको भिसा बुलेटिनमा परिवारमा आधारित सबै श्रेणीका ग्रिनकार्ड आवेदन दिने मिति र प्राप्त गर्ने मितिमा अगस्तको तुलनामा कुनै टसमस नभएपछि परिवारमा आधारित ग्रिनकार्डको प्रतिक्षा गरिररहेकाहरु निराश भएका छन् । परिवारमा आधारित सबै श्रेणीका ग्रिनकार्ड आवेदन दिने मिति र प्राप्त गर्ने मिति अगस्तकै भिसा बुलेटिनबाट सेप्टेम्बरका लागि कपिपेष्ट गरिएको छ । जसका कारण ग्रिनकार्ड फाइल गर्न र आप्रवासी भिसा वा ग्रिनकार्ड पाउन लाग्ने अवधि १ महिना थपिएको छ ।
अगस्तमा अमेरिकाभित्रै हुने ग्रिनकार्डवाहकका दम्पत्ति र छोराछोरीहरुको ग्रिनकार्ड फाइल गर्ने मिति एकैपटक साढे ७ महिना सरेर जुन १५, २०२४ मा आएको थियो । तर सेप्टेम्बरका लागि भने यो मिति टसमस नभएकाले सेप्टेम्बरमा पनि अगस्तमा जस्तै जुन १५, २०२४ भन्दा अगाडि आई १३० आवेदन फाइल गरेकाहरुले मात्र ग्रिनकार्ड आवेदन आई ४८५ पनि फाइल गर्न सक्नेछन् ।
ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुका लागि ग्रिनकार्ड फाइल गर्ने मिति गतबर्षको अगस्तसम्म कन्करेन्ट रहदै आएकोमा गतबर्षको सेप्टेम्बरदेखि भने कन्करेन्ट छैन । अथात् अमेरिकाभित्रै हुने ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुले आई १३० पिटिसन र ग्रिनकार्ड आवेदन आई ४८५ एकसाथ भने फाइल गर्न पाउँदैनन् । परिवारमा आधारित ग्रिनकार्डका लागि युएससीआईएसले सेप्टेम्बरका लागि पनि भिसा बुलेटिनमा रहेको फाइलिङ मितिलाई नै आधार मानेको छ ।
त्यस्तै अमेरिकाबाहिर हुने ग्रिनकार्डवाहकका दम्पत्ति र छोराछोरीका सन्दर्भमा भिसा पाउने मितिमा फेरबदल भएको छैन । अगस्तको भिसा बुलेटिनमा १५ नोभेम्बर २०२१ अगाडि प्राथमिकता मिति भएकालेमात्र आप्रवासी भिसा पाउनसक्ने उल्लेख भएकोमा सेप्टेम्बरका लागि समेत उक्त मितिमा फेरबदल नभएको हो । अर्थात् सेप्टेम्बरमा पनि अमेरिकाबाहिर हुने ग्रनकार्डवाहकका दम्पत्ति र छोराछोरीले आप्रवासी भिसा पाउनका लागि प्रतिक्षा अवधि झण्डै २ बर्ष १० महिना रहेको छ ।
यद्यपी उनीहरुको आवेदन युएससीआईएसबाट स्वीकृत भइसकेको खण्डमा भने जुन १५, २०२४ भन्दा अगाडि दिएको आवेदन नेशनल भिसा सेन्टरले डकुमेन्ट्री क्वालीफाइड हुनका लागि प्रकृया अगाडि बढाउँछ । तर भिसा अन्तरवार्ताका लागि भने भिसा बुलेटिनमा रहेको फाइनल एक्सन डेट नै प्रतिक्षा गर्नुपर्छ । युएससीआईएसले आई १३० आवेदन प्रकृयामा लैजान भने लामो समय लगाउने गरेको छ । उदाहरणका लागि ग्रिनकार्डवाहकका दम्पत्ति र छोराछोरीहरुका लागि फाइल गरिएको आई १३० आवेदनमा निर्णय हुन नेशनल बेनिफिट सेन्टरमा औषतमा ५ बर्ष लाग्ने गरेको छ ।
सेप्टेम्बरको भिसा बुलेटिन अनुशार अमेरिकी नागरिकका दाजुभाई दिदीबहिनीहरुलाई ग्रिनकार्ड पाउन लाग्ने अवधि १७ बर्ष १ महिना पुगेको छ । १ अगस्त २००७ भन्दा अगाडि आई १३० आवेदन पेश गरेर स्वीकृत भई नेशनल भिसा सेन्टरबाट सबै प्रकृया पूरा भएकाहरुले सेप्टेम्बरमा आप्रवासी भिसाका लागि अन्तरवार्ताको मिति पाउन सक्नेछन् ।
अमेरिकी नागरिकका दाजुभाई दिदीबहिनीहरुलाई ग्रिनकार्ड पाउन लाग्ने अवधि बढेको बढ्यै रहेको छ । जसका कारण सन् २००७ भन्दा पछाडि आई १३० आवेदन दिएका अमेरिकी नागरिकका दाजुभाई दिदीबहिनीहरुले आप्रवासी भिसा पाउन सकेका छैनन् । लामो समयको प्रतिक्षा अवधिका कारण भिसा कुरेर बसेका उनीहरु निराश भएका छन् ।
सेप्टेम्बरको भिसा बुलेटिन अनुशार अमेरिकी नागरिकका २१ बर्ष काटेका अविवाहित छोराछोरीहरुका लागि भिसा पाउन लाग्ने अवधि ८ बर्ष ११ महिना रहेको छ । अर्थात् २२ अक्टोबर २०१५ भन्दा अगाडि आई १३० आवेदन दिएकाहरुले सेप्टेम्बरमा भिसा पाउन सक्नेछन् ।
त्यस्तै ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुले भिसा पाउन लाग्ने अवधि २ बर्ष १० महिना रहेको छ । अर्थात् १५ नोभेम्बर २०२१ भन्दा अगाडि आई १३० आवेदन दिएकाहरुले सेप्टेम्बरमा भिसा पाउन सक्नेछन् ।
ग्रिनकार्डवाहकका २१ बर्ष काटेका अविवाहित छोराछोरीहरुका लागि भिसा पाउन लाग्ने अवधि ८ बर्ष ४ महिना रहेको छ । अर्थात् १ मे २०१६ भन्दा अगाडि आई १३० आवेदन दिएकाहरुले सेप्टेम्बरमा भिसा पाउन सक्नेछन् । अमेरिकी नागरिकका विवाहित छोराछोरीहरुका लागि भिसा पाउन लाग्ने अवधि १४ बर्ष ५ महिना रहेको छ । अर्थात् १ अप्रिल २०१० भन्दा अगाडि आई १३० आवेदन दिएकाहरुले सेप्टेम्बरमा भिसा पाउन सक्नेछन् ।
