प्रकाशित मिति : फाल्गुन १९, २०८१ सोमबार
युक्रेनका राष्ट्रपति भोलोदिमर जेलेन्स्कीले सुरक्षा ग्यारेन्टीहरू बिनाको युद्धविराम असफल हुने बताएका छन । बेलायती मिडियासँग कुराकानी गर्दै उनले रुसी आक्रमणको दीर्घकालीन अन्त्य आवश्यक रहेको बताए ।
लन्डनमा युरोपेली मित्रराष्ट्रहरूसँगको वार्तापछि पत्रकार सम्मेलनमा जेलेन्स्कीले युद्धविरामले युद्ध अन्त्य गर्ने विचारलाई ‘पर्याप्त नभएको’ भन्दै खारेज गरेका छन ।
फ्रान्सेली राष्ट्रपति इम्मानुएल म्याक्रोनले फ्रान्स र बेलायतले युक्रेनमा ‘हावामा, समुद्रमा र ऊर्जा पूर्वाधारमा’ एक महिनाको युद्धविरामको प्रस्ताव गरिरहेको बताएका थिए ।
युक्रेनलाई गम्भीर सुरक्षा ग्यारेन्टीहरू बिना युद्धविरामका लागि बाध्य पारिएमा यो सबैका लागि एक असफलता हुनेछ जेलेन्स्कीले भनेका छन । उनले रुसले सम्झौता तोड्ने र युक्रेनले जवाफी कारबाही गर्ने अनुमान गरे ।
तर उनले आइतबारको वार्तालाई ‘धेरै शक्तिशाली सुरुआत’ भनेर वर्णन गरेका छन ।
शुक्रबार वासिङ्टनमा भएको तनावपूर्ण वार्ताको क्रममा अमेरिकी राष्ट्रपति डोनाल्ड ट्रम्प र उपराष्ट्रपति जे डी भान्सले जेलेन्स्कीलाई ‘कृतज्ञ’ नभएको र प्रस्तावित युद्धविराम सर्तहरू स्वीकार गर्न अस्वीकार गरेको आरोप लगाएका थिए ।
रुसले जेलेन्स्की वैध राष्ट्रपति नभएको बारम्बार जोड दिएको छ । तर युक्रेनको मार्शल लले चुनाव गर्न कानूनी प्रतिबन्ध लगाएको छ ।