प्रकाशित मिति : बैशाख ८, २०८२ सोमबार
अमेरिकी राष्ट्रपति डोनाल्ड ट्रम्पले रक्षामन्त्री पीट हेग्सेथको दृढ समर्थन गरेका छन्। हेग्सेथले यमनको इरान-समर्थित हूथी समूहमाथि मार्चमा भएको आक्रमणको संवेदनशील विवरण गैर-वर्गीकृत सन्देश प्रणाली सिग्नलमार्फत साझा गरेको खबरहरू बाहिर आएपछि व्हाइट हाउसकी प्रवक्ता क्यारोलिन लेभिटले सोमबार यस्तो बताएकी हुन् ।
रिपोर्टहरूका अनुसार, हेग्सेथले दोस्रो पटक सिग्नल च्याटमा यस्तो विवरण साझा गरेका थिए, जसमा उनकी पत्नी, भाइ र व्यक्तिगत वकिल समावेश थिए। यो च्याटमा करिब एक दर्जन व्यक्तिहरू सामेल थिए । उक्त च्याट प्रशासनिक विषयहरूमा छलफल गर्न बनाइएको थियो, न कि सैन्य योजनाका लागि। उनको भाइ, जो पेन्टागनमा डिपार्टमेन्ट अफ होम सेक्युरिटीको सम्पर्क व्यक्ति हुन्, पनि यो च्याटमा सामेल थिए।
गत हप्ता हेग्सेथले पहिले सिग्नल प्रयोग गरेको विषयमा पेन्टागनमा भएको आन्तरिक चुहावट अनुसन्धानको क्रममा वरिष्ठ अधिकारीहरूलाई हटाइएपछि यो खुलासा हो । यद्यपि, लेभिटले फक्स न्यूजलाई बताएअनुसार, ‘राष्ट्रपति हेग्सेथको पक्षमा दृढतापूर्वक उभिएका छन्, जो पेन्टागनमा उत्कृष्ट नेतृत्व गरिरहेका छन्।’
उनले थपिन्, ‘यो त्यस्तो समयमा भएको छ, जब सम्पूर्ण पेन्टागन उनको र उनले ल्याउन खोजेको परिवर्तनको विरुद्धमा छ।’
लेभिटले हेग्सेथले कुनै पनि सिग्नल च्याटमा वर्गीकृत जानकारी साझा नगरेको दाबी गरिन्। यद्यपि, यो दोस्रो च्याटमा साझा गरिएको विवरण द अटलान्टिक पत्रिकाले गत महिना खुलासा गरेको विवरणसँग मिल्दोजुल्दो रहेको रायटर्सले जनाएको छ।
उक्त पत्रिकाका प्रधान सम्पादक जेफ्री गोल्डबर्गलाई गल्तीले अर्को सिग्नल च्याटमा समावेश गरिएको थियो।